Месца правядзення
З 7 снежня ў бібліятэцы працуе выстаўка Валерыя Слаука “Графіка”, прысвечаная 70-годдзю мастака.
“Беларускі Дзюрэр”, мастак-віртуоз і непераўзыдзены фантазёр Валерый Слаук запрашае паглыбіцца ва ўласны дзівосны свет, населены сотнямі фантастычных персанажаў.
Творчасць Валерыя Слаука – адна з самых яркіх з'яў у сучаснай беларускай графіцы. Яго почырк пазнаецца адразу: манахромная, чорна-белая графіка, створаная з ювелірнай дакладнасцю і рэалістычнасцю.
Мастак працуе пераважна ў кніжнай графіцы. Яго ілюстрацыі надалі аб’ём і выразнасць шматлікім беларускім і замежным творам, “ажывілі” двухтомную энцыклапедыю “Беларускі фальклор”. Увогуле славянская міфалогія стала адной з галоўных тэм у яго творчасці: чараўнікі, дамавікі, волаты, русалкі, вадзянікі, створаныя ўяўленнем мастака, ажываюць і запаўняюць штодзённую рэальнасць.
Выстаўка фантастычная, загадкавая, шматзначная і, разам з тым, поўная тонкай іроніі. Яна патрабуе ад гледача няспешнага знаёмства, уважлівасці і ўдумлівасці.
Валерый Слаук (1947 г.н., г.п. Коханава Віцебскай вобласці) – знакаміты мастак і ілюстратар, прафесар кафедры графікі Беларускай дзяржаўнай акадэміі мастацтваў. У 1977 годзе скончыў Беларускі дзяржаўны тэатральна-мастацкі інстытут.
Творы мастака захоўваюцца ў Нацыянальным мастацкім музеі, фондах Беларускага саюза мастакоў, прыватных калекцыях і музеях Аўстрыі, Італіі, Германіі.
Вернісаж пачнецца а 16-й гадзіне ў галерэі “Ракурс” (2-гі паверх).
Паглыбіцца ў фантасмагарычны свет Валерыя Слаука магчыма да 18 студзеня 2018 года.
Дата заканчэння работы выстаўкі можа быць зменена.
Е-mail: pr@nlb.by
