З 5 студзеня па 30 сакавіка ў бібліятэцы (выставачная пляцоўка, 3-ці паверх) праходзіць юбілейная выстаўка “Вышыня Уладзіміра Высоцкага”, прысвечаная 80-годдзю з дня нараджэння знакамітага паэта, акцёра і выканаўца аўтарскіх песень.
У экспазіцыі сабрана больш за 300 дакументаў, сярод якіх – кнігі, фотаальбомы, паштоўкі, грампласцінкі, кампакт-дыскі з фонду Нацыянальнай бібліятэкі, а таксама з асабістых калекцый прыхільнікаў творчасці Высоцкага.
Уладзімір Сямёнавіч стаў кумірам для жыхароў вялікай краіны як акцёр тэатра і кіно, аўтар і выканаўца песень. Яго сумленная, шчырая паэзія высока цанілася. Людзі, якія палюбілі творчасць паэта, расшыфроўвалі пацёртыя аўдыязапісы, перапісвалі з памылкамі, але стваралі зборнікі яго песень для сябе, для сяброў, для Высоцкага. Такіх “збораў твораў” было шмат па краіне. Цяпер яны ўяўляюць сабой гістарычную і бібліяграфічную каштоўнасць.
На выстаўцы прадстаўлена адно з такіх унікальных выданняў, якое выйшла ў год яго смерці. Гэта першы том збору вершаў і песень У. Высоцкага. У зборнік увайшлі 100 твораў аўтара і некаторыя вершы, прысвечаныя Уладзіміру Сямёнавічу (да канца 1980 года іх было напісана больш за 700).
Аб легальным выданні ў той час не магло быць і гаворкі...
Уладзімір Высоцкі напісаў больш за 600 песень і вершаў, і марыў калі-небудзь убачыць легальна выдадзеную кнігу. Такая кніга з’явілася толькі праз год пасля яго смерці – выдавецтва “Современник” выпусціла першы зборнік паэта “Нерв”. У кнізе былі надрукаваны 130 вершаў, але ўсё роўна большая частка спадчыны Высоцкага заставалася ў краіне пад негалоснай забаронай. Пра кнігу чулі ўсе, шмат хто чытаў рэцэнзіі на яе ў “Юности” і “Литературном обозрении”. Прыхільнікі бралі экземпляр у бібліятэцы, шмат хто чытаў, а знаходзіліся людзі, якія перапісвалі яго ад рукі. У экспазіцыі прадстаўлены гэта легендарнае выданне 1981 года і два яго перавыданні (1988, 1989).
З паэтычнай спадчынай У.С. Высоцкага наведвальнікаў выстаўкі знаёміць сучасны зборнік “Я однажды гулял по столице” (2009). Уладзімір Сямёнавіч заўсёды быў прывязаны да роднага горада: Першая Мяшчанская, Вялікі Карэтны, Таганка – гэтыя адрасы вызначылі кампазіцыю кнігі, абумовілі яе асноўныя раздзелы. У зборнік увайшлі як творы паэта, так і фрагменты ўспамінаў і эсэ пра яго, яго творчасць. Кніга праілюстравана фатаграфіямі з фонду Дзяржаўнага культурнага цэнтра-музея імя У.С. Высоцкага.
На выстаўцы экспануюцца кнігі-ўспаміны пра Уладзіміра Сямёнавіча, якія ярка прадстаўляюць яго шматгранную асобу. Да прыкладу, у кнізе У. Новікава ”Высоцкий” распавядаецца пра чалавека, чый голас у 70-80-я гады слухалі літаральна ў кожным доме. З гэтай кнігі чытач пазнае новыя біяграфічныя падрабязнасці пра жыццё У.С. Высоцкага, яго ўзлёты і падзенні, страсці і няўдачы. Аўтар кнігі глыбока прааналізаваў творчасць Высоцкага-паэта і паспрабаваў вызначыць яго месца ў культурна-гістарычным кантэксце эпохі.
Выклікаюць цікавасць кнігі М. Уладзі “Владимир, или Прерванный полёт”, В. Залатухіна “Секрет Высоцкого”, В. Перавозчыкава “Ну здравствуй, это я!”, Э. Разанава “Четыре вечера с Владимиром Высоцким”, А. Сямёнава “Таганка без занавеса, бутафории и грима…” і інш.
Выстаўка прызначана для шырокага кола чытачоў.
Тэлефон для даведак: (8 017) 293 29 80.