4 мая ў бібліятэцы адкрылася персанальная выстаўка Уладзіміра Чарнышова "Званы".
Жывапісец і графік Уладзімір Чарнышоў скончыў Пензенскае мастацкае вучылішча імя К.А. Савіцкага і Усесаюзны дзяржаўны інстытут кінематаграфіі, каля 30 гадоў працаваў мастаком-пастаноўшчыкам на кінастудыі "Беларусьфільм", выкладаў у Беларускай дзяржаўнай акадэміі мастацтваў і Беларускім дзяржаўным універсітэце культуры і мастацтваў. Быў галоўным мастаком Акадэмічнага рускага драматычнага тэатра імя М. Горкага ў Мінску.
Жыццё тэатра і кіно заўсёды перасякалася з творчасцю мастака. Не выпадкова сярод яго палотнаў так многа партрэтаў вядомых дзеячаў культуры, такіх як Сяргей Рахманінаў, Расціслаў Янкоўскі, Юрый Іваноў, Сяргей Кацьер, Фёдар Шаляпін і інш. Натхнёны жыццём і творчасцю гэтых легендарных людзей, Уладзімір Чарнышоў стварыў карціны-"званы", якія заклікаюць гледача спыніцца, прыгледзецца і прыслухацца... пра што яны гавораць.
У вернісажы ўзялі ўдзел першы намеснік дырэктара Нацыянальнай бібліятэкі Беларусі па абслугоўванні карыстальнікаў і ідэалогіі Алена Далгаполава, старшыня Беларускага саюза мастакоў Рыгор Сітніца, першы намеснік старшыні праўлення Беларускага саюза музычных дзеячаў, віцэ-прэзідэнт Міжнароднага саюза музычных дзеячаў Наталля Вітчанка, сябры, калегі і блізкія знаёмыя мастака.
Пазнаёміцца з работамі Уладзіміра Чарнышова можна ў галерэі "Ракурс" (2-гі паверх) да 15 ліпеня 2017 года.
Дата заканчэння працы выстаўкі можа быць зменена.
Тэлефоны для даведак: (8 017) 293 28 23, 266 37 37, 293 27 56.
Е-mail: pr@nlb.by