15 сакавіка ў бібліятэцы прайшла ўрачыстая цырымонія ўручэння пашпартоў і членскіх білетаў БРСМ навучэнцам Першамайскага раёна г. Мінска.
Мерапрыемства, прымеркаванае да Дня Канстытуцыі Рэспублікі Беларусь, адбылося ў рамках Усебеларускай патрыятычнай акцыі “Мы – грамадзяне Беларусі!”.
Урачыстасць, афіцыяльнасць і лёгкае хваляванне – не кожны дзень уручаюць такія важныя дакументы, як пашпарт. Удзельнікі цырымоніі ў сваім юным узросце ў поўнай меры ўсведамляюць, што атрыманне “білета ў дарослае жыццё” мяжуе не толькі з пэўнай свабодай, але таксама і з вялікай адказнасцю.
Галоўны дакумент навучэнцам Першамайскага раёна ўручылі ганаровыя госці цырымоніі – кіраўнік адміністрацыі Першамайскага раёна г. Мінска Ігар Кудрэвіч, дэпутат Палаты прадстаўнікоў Нацыянальнага сходу Рэспублікі Беларусь Сяргей Бобрыкаў і дэпутат Мінскага гарадскога Савета дэпутатаў Яўген Святагор.
Самых актыўных і таленавітых хлопчыкаў і дзяўчынак, тых, хто заўсёды прывык быць у першых шэрагах, чакаў яшчэ адзін важны дакумент – членскі білет БРСМ. У цырымоніі ўручэння ўзялі ўдзел першы сакратар БРСМ Першамайскага раёна Алена Лісай, начальнік упраўлення адукацыі адміністрацыі Першамайскага раёна г. Мінска Людміла Барысенка і намеснік начальніка упраўлення ідэалагічнай работы, культуры і па справах моладзі адміністрацыі Першамайскага раёна Лілія Кавалёва.
Пасля ўрачыстай часткі для дзяцей прайшла аглядная экскурсія па Нацыянальнай бібліятэцы Беларусі, падчас якой яны пазнаёміліся з незвычайнай архітэктурай будынка і даведаліся пра каласальныя магчымасці, якія адкрывае перад імі “дыямент ведаў”.