19 красавіка ў бібліятэцы адкрылася выстаўка “З тых даўніх дзён да сённяшняга часу”, прысвечаная юбілею Нацыянальнага акадэмічнага Вялікага тэатра оперы і балета Рэспублікі Беларусь.
Экспазіцыя выстаўкі – сапраўдны тэатральны летапіс аб тым, як на сцэне Вялікага запальваліся зоркі оперы і балета, як у розныя часы, нават самыя складаныя і трагічныя, тэатр вучыў гледача разважаць і цаніць жыццё, захоўваў лепшыя традыцыі высокага мастацтва, рухаўся насустрач новым эксперыментам і гучным прэм’ерам.
85 гадоў творчага жыцця Вялікага тэатра Беларусі адлюстраваны ў афішах розных часоў, музычных партытурах, на старонках часопісу “Партэр”. У іх не проста гісторыя, а найперш – праца майстроў сцэны, таленавітых і адданых служэнню высокаму мастацтву.
Дырэктар Нацыянальнай бібліятэкі Беларусі Раман Матульскі выказаў словы віншавання калектыву тэатра з нагоды важкай юбілейнай даты.
У адкрыцці выстаўкі прынялі ўдзел генеральны дырэктар Вялікага тэатра оперы і балета Рэспублікі Беларусь Уладзімір Грыдзюшка, мастацкі кіраўнік балета Вялікага тэатра Юрый Траян, загадчыца опернай трупы Вялікага тэатра Ніна Казлова, начальнік службы маркетынгу, інфармацыі і рэкламы Вялікага тэатра Таццяна Аляксандрава, аматар тэатра, намеснік прэм’ер-міністра Рэспублікі Беларусь у 2001−2005 гг., Надзвычайны і Паўнамоцны Пасол Рэспублікі Беларусь у Літоўскай Рэспубліцы і Фінляндскай Рэспубліцы ў 2006−2014 гг. Уладзімір Дражын.
Сапраўдным падарункам для гасцей вечара стала выступленне выбітных салістаў Вялікага тэатра, лаўрэатаў міжнародных конкурсаў Марыны Ліхашэрст і Андрэя Кліпо ў музычным суправаджэнні канцэртмайстра, дыпламанта міжнародных конкурсаў і фестываляў Ірыны Целяпнёвай.
Экспазіцыя будзе адкрыта да прагляду ў галерэі “Лабірынт” (3-ці паверх) да 20 чэрвеня 2018 года.
Дата завяршэння работы выстаўкі можа быць зменена.
Тэлефоны для даведак: (8 017) 266 37 37, 293 28 23.
Е-mail: pr@nlb.by
