Прэзентацыя вынікаў міжнароднага навуковага і выдавецкага праекта па факсімільным узнаўленні кніжнай спадчыны Францыска Скарыны адбылася ў Рызе 16 лютага. Падчас мерапрыемства намеснік дырэктара па навуковай рабоце і выдавецкай дзейнасці Нацыянальнай бібліятэкі Беларусі Алесь Суша перадаў поўны камплект факсімільнага выдання ў дар Акадэмічнай бібліятэцы Латвійскага ўніверсітэта.
Святочная вечарына прайшла на базе самай старажытнай бібліятэкі Латвіі – Акадэмічнай бібліятэкі Латвійскага ўніверсітэта, якая была заснавана яшчэ ў 1524 годзе і зберагае ўнікальныя кніжныя зборы, у тым ліку некаторыя знакавыя помнікі беларускага паходжання. Прадстаўнікі Пасольства Рэспублікі Беларусь у Латвійскай Рэспубліцы, беларускіх грамадскіх арганізацый, устаноў культуры і навукі Латвіі і госці з Беларусі абмеркавалі дасягненні і перспектывы супрацоўніцтва. У межах мерапрыемства таксама былі дасягнуты дамоўленасці пра арганізацыю супольных сустрэч, прэзентацый, выставак, навуковых форумаў і дыскусій па актуальных пытаннях кніжнай культуры Беларусі і Латвіі.
Міжнародны навуковы і выдавецкі праект па ўзнаўленні кніжнай спадчыны беларускага першадрукара, які быў рэалізаваны Нацыянальнай бібліятэкай Беларусі і Банкам БелВЭБ і завяршыўся ў мінулым годзе, стаў кульмінацыяй юбілейных мерапрыемстваў у Беларусі і за мяжой. Стварэнне факсіміле – своеасаблівы каталізатар цэлага шэрагу новых ініцыятыў, якія пройдуць у бліжэйшыя гады у Беларусі і за мяжой і будуць скіраваны на папулярызацыю кніжнай спадчыны нашай краіны.
На восень 2018 г. запланавана правядзенне Дзён беларускай культуры ў Латвіі, якія пройдуць у розных рэгіёнах краіны. Абумоўлена гэта тым, што ў Латвіі пражывае выключна вялікая беларуская дыяспара, якая традыцыйна прымае актыўны ўдзел у гэтых святочных мерапрыемствах.