24 красавіка ў рамках святкавання 400-годдзя “Буквара” ў Нацыянальнай бібліятэцы быў арганізаваны майстар-клас для студэнтаў факультэта пачатковай адукацыі Беларускага дзяржаўнага педагагічнага ўніверсітэта імя М. Танка.
Сучаснымі навуковымі і метадычнымі напрацоўкамі па навучанні грамаце з будучымі педагогамі падзялілася Любоў Мікалаеўна Карканіца – настаўнік вышэйшай катэгорыі ДУА “Гімназія з беларускай мовай навучання № 23 г. Мінска”. Педагог правяла майстар-клас “Метады і прыёмы работы з падручнікам «Буквар» А. Клышкі для 1-га класа ўстаноў агульнай сярэдняй адукацыі з беларускай мовай навучання”.
“Буквар” Анатоля Клышкі – адзін з лепшых беларускіх буквароў ХХ – пачатку ХХІ ст., упершыню выдадзены ў 1969 г. і перавыдадзены 23 разы на беларускай, рускай і польскай мовах. Ён атрымаў залаты медаль Міжнароднай лейпцыгскай кніжнай выставы ў 1977 г., а ў 2004-м прызнаны лепшым падручнікам года на выстаўцы ў Франкфурце-на-Майне. Пры стварэнні падручніка аўтар вывучыў больш за 500 буквароў розных краін на розных мовах. У яго буквары шмат казак, загадак, лічылак, прыказак, прымавак, народных прыкмет, рэбусаў, гульняў з гукамі, літарамі, словамі. Разнастайныя тэксты распавядаюць дзецям пра краіну, славутых дзеячаў Беларусі, традыцыі і прыроду.
Удзел у майстар-класе прынялі выкладчыкі і студэнты Беларускага дзяржаўнага педагагічнага ўніверсітэта імя М. Танка.
