15 лютага ў бібліятэцы ў рамках афіцыйнага візіту ў Рэспубліку Беларусь прэм'ер-міністра Турэцкай Рэспублікі Біналі Йылдырыма адбылася ўрачыстая цырымонія перадачы кніг прэзідэнтам Нацыянальнай бібліятэкі Турцыі Зюльфі Таманам у дар Нацыянальнай бібліятэцы Беларусі.
Фонд Нацыянальнай бібліятэкі Беларусі папоўніла калекцыя з 1500 экзэмпляраў кніг на турэцкай мове па эканоміцы, культуры, навуцы, гісторыі, палітыцы, уключаючы энцыклапедычныя і даведачныя выданні, кнігі для дзяцей і іншыя. Як адзначыў Зюльфі Таман, гэтыя выданні будуць актуальныя для людзей, якія вывучаюць турэцкую мову і цікавяцца культурай краіны. Ён выказаў надзею на далейшае супрацоўніцтва і плённую працу па розных напрамках бібліятэчнай дзейнасці, паабяцаўшы ў тым ліку перадаваць у Нацыянальную бібліятэку цікавыя турэцкія кнігі.
Дырэктар Нацыянальнай бібліятэкі Беларусі Раман Матульскі адзначыў, што кнігі, якімі папоўніўся фонд бібліятэкі, будуць вельмі запатрабаваныя ў сувязі з ростам цікавасці да гісторыі, культуры і традыцый Турцыі. Таксама ён падкрэсліў важнасць падпісанага 14 лютага Мемарандума аб узаемаразуменні паміж Нацыянальнай бібліятэкай Турцыі і Нацыянальнай бібліятэкай Беларусі, задачамі якога з'яўляюцца ўмацаванне ўзаемадзеяння паміж дзвюма бібліятэкамі ў прафесійнай дзейнасці і садзейнічанне ўсталяванню карпаратыўных сувязей у галіне навукі, культуры і распаўсюджвання навуковай інфармацыі.
У рамках урачыстай цырымоніі была арганізавана фотавыстаўка “Сляды Стамбула: ад імперыі да рэспублікі”, дзе былі прадстаўлены чорна-белыя фотаработы, якія адлюстроўваюць гісторыю Турцыі.
Ва ўрачыстай абстаноўцы Раман Матульскі перадаў у дар Зюльфі Таману электронную копію кнігі англійскага дыпламата, гісторыка і падарожніка Паўля Рыко “Манархія Турэцкая…”. Гэта погляд на Турцыю як на еўрапейскую краіну са сваёй гісторыяй, культурай і традыцыямі. У кнізе дакладна апісаны асновы дзяржаўнага кіравання, звычаі краіны і яе ўнутраная палітыка, рэлігія і законы турэцкага грамадства. Выданне пабачыла свет у 1678 годзе ў Слуцку.
Напрыканцы мерапрыемства Раман Матульскі распавёў пра будучую цырымонію перадачы шматтомнага факсіміле “Кніжная спадчына Францыска Скарыны” ў дар Нацыянальнай бібліятэцы Турцыі, якая пройдзе ў Пасольстве Рэспублікі Беларусь у Турэцкай Рэспубліцы.
Ініцыятары праекта на працягу пяці гадоў працавалі над стварэннем 21-томнага факсіміле, збіраючы пад адзінай вокладкай кнігі, выдадзеныя Скарынам у Празе і Вільні. Цяпер, калі праект завершаны і надрукаваны апошнія тамы, каштоўнае выданне папаўняе фонды найбуйнейшых культурных цэнтраў ва ўсім свеце.
