Вялікі талент, вялікая праца, вялікае сэрца

Штогадовая кніжна-ілюстрацыйная выстаўка прадстаўляе калектывы, асобных дзеячаў культуры і духавенства, якія ў 2017 годзе асабліва вылучыліся ў гуманітарнай сферы і былі адзначаны высокімі дзяржаўнымі прэміямі.

15 узнагарод былі зацверджаны ўказамі Прэзідэнта Рэспублікі Беларусь – № 1 “Аб прысуджэнні прэміі Прэзідэнта Рэспублікі Беларусь «За духоўнае адраджэнне»” і № 2 “Аб прысуджэнні спецыяльнай прэміі Прэзідэнта Рэспублікі Беларусь дзеячам культуры і мастацтва 2017 года”.

У экспазіцыі ўказаны дасягненні лаўрэатаў дзяржаўных прэмій, а таксама падабраны кнігі, каталогі, буклеты, артыкулы з перыядычных выданняў, выяўленчыя дакументы з фондаў бібліятэкі, якія раскрываюць сферу іх дзейнасці.

Радаснай падзеяй для калектыву Нацыянальнай бібліятэкі Беларусі стала прысуджэнне прэміі Прэзідэнта Рэспублікі Беларусь “За духоўнае адраджэнне” за дзейнасць па факсімільным узнаўленні і папулярызацыі кніжнай спадчыны Францыска Скарыны. На выстаўцы можна ўбачыць вынік пяцігадовай навуковай працы супрацоўнікаў бібліятэкі – поўны збор кніг Францыска Скарыны. Выдавецкі праект “Кніжная спадчына Францыска Скарыны” быў здзейснены пры падтрымцы банка БелВЭБ.

У 2018 годзе глава дзяржавы ўручыў прэміі за значны ўклад у замацаванне ідэй чалавекалюбства, дабрачыннасці і міласэрнасці; за плённую працу па ўмацаванні інстытута сям’і, ахове мацярынства і дзяцінства; за заслугі па арганізацыі сацыяльнай дапамогі дзецям-інвалідам і іншым катэгорыям грамадзян; за значны асабісты ўклад у захаванне духоўных каштоўнасцей і традыцый.

Не засталіся незаўважанымі дасягненні ў сферы тэатральнага, музычнага і выяўленчага мастацтва, а таксама народнай творчасці і выставачнай дзейнасці.

Прысуджэнне высокіх узнагарод і штогадовае ўшанаванне лаўрэатаў прэмій з’яўляецца яркім сведчаннем пастаяннай увагі дзяржавы да пытанняў фарміравання ў грамадстве здаровай духоўнай атмасферы, развіцця беларускай культуры і мастацтва.