Дата правядзення
Час правядзення
Месца правядзення
З 11 мая па 11 чэрвеня ў зале нотных і аўдыявізуальных дакументаў (пам. 305) праходзіць выстаўка “Рускі Бах”, прымеркаваная да 80-годдзя з дня нараджэння Юрыя Маркавіча Буцко.
У шэрагу найбольш цікавых, неардынарных музыкантаў нашага часу бачнае месца належыць расійскаму кампазітару Юрыю Буцко (1938–2015), аднаму з самых змястоўных і глыбокіх аўтараў сучаснасці. За самабытнасць мыслення, моц таленту ў музычных колах яго называлі “рускі Бах”. Кампазітарам напісана мноства інструментальных твораў, опер, харавой музыкі і музыкі для дзяцей. Ён належыць да ліку першых прадстаўнікоў рускага рэлігійнага адраджэння, якое пачалося ў 60-я гады. Уся творчасць гэтага аўтара прасякнута любоўю да роднай культуры, яе традыцый, глыбокім філасофскім разуменнем жыцця. Таксама Юрый Маркавіч пісаў музыку да фільмаў, тэлепастановак і спектакляў, якая карысталася вялікім поспехам.
Асноўную частку выстаўкі складаюць нотныя выданні: знакамітая опера-маналог “Запіскі вар'ята” па аднайменнай аповесці М. Гогаля, опера “Белыя ночы” па рамане Ф. Дастаеўскага, “Шэсць сцэн” на вершы А. Блока з паэмы “Дванаццаць”, кантата № 3 Вясельныя песні, сімфонія-рэчытатыў, сімфонія для струннага аркестра, сімфонія ў чатырох фрагментах, шэсць п’ес для фартэпіяна “З дзённіка”, вакальны цыкл “Адзінота” і шматлікія зборнікі, у якіх можна знайсці творы кампазітара.
Аўдыядакументы, прадстаўленыя ў экспазіцыі, знаёмяць з операмі, сімфоніяй у 4-х фрагментах, п'есай “Плач”, а таксама музыкай, напісанай Ю. Буцко да інсцэніроўкі дзіцячых казак: “Сіўка-Бурка”, “Казка пра Каліфу-бусла”, “Карлік Нос”, “Як дастаць жывую малпу” і інш.
Артыкулы з кніг і перыядычных выданняў дапаўняюць выстаўку інфармацыяй пра творчасць знакамітага кампазітара.
Усяго экспазіцыя налічвае больш за 70 дакументаў.
Час работы выстаўкі адпавядае рэжыму работы бібліятэкі.
Уваход на выстаўку – па чытацкім білеце або білеце сацыякультурнага цэнтра бібліятэкі.
Тэлефон для даведак: (8 017) 293 27 52.