Запрашаем школьнікаў на заняткі на выстаўцы “Беларусь і Біблія”

Музей кнігі запрашае школьнікаў 1–11 класаў на заняткі на выстаўцы “Беларусь і Біблія”, каб разам пабачыць унікальныя артэфакты і пазнаёміцца з гісторыяй стварэння, распаўсюджвання і захавання самай вядомай і ключавой кнігі ў гісторыі чалавецтва – Бібліі.

Сапраўдныя старажытныя рукапісы на папірусе і пергамене, сярэдневяковыя манускрыпты, першыя друкаваныя кнігі можна будзе ўбачыць не ў падручніках і энцыклапедыях, а перад вачыма ў музейнай экспазіцыі!

На занятках удзельнікі даведаюцца, чаму Біблію называюць цэлай бібліятэкай, што такое Септуагінта і Вульгата, з якіх матэрыялаў і якіх формаў ствараліся Бібліі. Школьнікам будзе цікава ўбачыць калекцыю тораў, у тым ліку Тору ў вертыкальным футляры са срэбра, а таксама ілюстраваную мініяцюрную, упрыгожаную арнаментам з кветак і вінаграднай лазы.

Школьнікі паразважаюць, чаму вынаходства кнігадрукавання справядліва лічыцца сапраўдным прарывам у гісторыі чалавечай цывілізацыі. Яны ўбачаць на выстаўцы першыя еўрапейскія старадрукаваныя Бібліі, выданні беларускага першадрукара Францыска Скарыны і яго паслядоўнікаў, пераклады біблейскіх тэкстаў на беларускую і еўрапейскія мовы, прыклады мастацкага афармлення Святога Пісання лепшымі майстрамі XVІ–XXІ стст.

Кошт: 4 руб. 50 кап.

Запіс на заняткі і даведкі па тэлефонах: (8 017) 293 27 82, 
(8 025) 994 21 12.