Дата правядзення
Нацыянальная бібліятэка Беларусі адкрывае серыю яркіх мерапрыемстваў “Берасцейская Біблія: адкрыты дотык”, прысвечаных кніжнаму шэдэўру эпохі Адраджэння. Хто не марыць дакрануцца да гісторыі? У прамым і пераносным сэнсе такую магчымасць атрымае кожны.
У пачатку верасня арыгінал Берасцейскай Бібліі быў урачыста падараваны Прэзідэнтам нашай краіны гораду над Бугам, а Нацыянальная бібліятэка падрыхтавала факсімільнае выданне знакамітага помніка. Верасень сімвалічны яшчэ і таму, што менавіта ў гэтым месяцы кніга пабачыла свет у Берасці ў 1563 г.
У сувязі з гэтым бібліятэка плануе правесці вялікі цыкл мерапрыемстваў самага рознага фармату і для рознай аўдыторыі, каб для ўсіх і кожнага прадэманстраваць сапраўдны шэдэўр нацыянальнай культуры.
Падчас першай сустрэчы будзе агучана агульная праграма мерапрыемстваў “Берасцейскай восені”. Усе ўдзельнікі будуць мець унікальную магчымасць пагартаць факсімільнае выданне Берасцейскай Бібліі і даведацца, да чаго ж дакранаюцца.
Першы “дотык” – публічная лекцыя знаўцы беларускай кніжнай культуры, кандыдата культуралогіі Алеся Сушы. Ён дасць адказы на шматлікія пытанні пра самае загадкавае, прыгожае і дарагое выданне ў айчыннай гісторыі. А, на жаль (ці на шчасце?), пытанняў вельмі шмат.
Прыйдзіце і дакраніцеся да кніжнага шэдэўра!
Пачатак лекцыі: 27 верасня а 15-й гадзіне.
Месца правядзення: 2-гі паверх, зона атрыума (“на шкле”).
Тэлефоны для даведак: (8 017) 293 27 81, 293 27 82, 293 25 03.
Чытайце таксама, як прайшла лекцыя Алеся Сушы.
