З пашанай да роднай мовы і чалавечых лёсаў

У зале беларускай літаратуры (пам. 205) з 2 кастрычніка да 1 лістапада праходзіць кніжная выстаўка “З пашанай да роднай мовы і чалавечых лёсаў”, прысвечаная 70-годдзю беларускага лінгвіста, педагога, выдатніка адукацыі Беларусі Паўла Аляксандравіча Міхайлава.

Імя Паўла Аляксандравіча добра вядома навукоўцам, выкладчыкам, студэнтам не толькі ў Беларусі, але і па-за яе межамі. Ён аўтар шматлікіх даследаванняў па беларускай дыялекталогіі, лінгвагеаграфіі, анамастыцы, тэрміназнаўстве, гісторыі лінгвістыкі і акцэнталогіі. Сэнсам жыцця таленавітага вучонага стала даследаванне жывой народнай мовы.

Экспазіцыя знаёміць з працамі Паўла Аляксандравіча, сярод якіх “Сучасная беларуская літаратурная мова”, “Мовазнаўцы”, “Лексічны атлас беларускіх народных гаворак”, “Лінгвістычны мікраатлас Тураўшчыны”, “Беларуская мова: тэматычны трэнажор”, “Слоўнік беларускіх гаворак паўночна-заходняй Беларусі і яе пагранічча”, “Тураўскі слоўнік” і іншыя. Асобныя выданні паказваюць працу П.А. Міхайлава ў якасці рэдактара.

Шматлікія артыкулы даследчыка прысвечаны калегам-мовазнаўцам. На выстаўцы прадстаўлены публікацыі ў часопісах, энцыклапедычных выданнях, прысвечаныя вывучэнню жыцця і навуковай спадчыны М.Г. Булахава, Н.Т. Вайтовіч, Ф.Д. Клімчука, І.І. Насовіча, Ю.Ф. Мацкевіч, А.І. Чабярук, Ф.М. Янкоўскага, М.С. Яўневіча і інш.

Выдатны спецыяліст і таленавіты педагог, П.А. Міхайлаў зрабіў важкі ўклад у

падрыхтоўку спецыялістаў вышэйшай кваліфікацыі. Пад яго кіраўніцтвам напісалі і паспяхова абаранілі кандыдацкія даследаванні С.І. Фацеева, Т.Я. Старасценка, Д.В. Дзятко, В.В. Урбан, А.І. Калечыц, С.У. Шахоўская, Ю.В. Чарнякевіч, Н.А. Радзіваноўская.

Тэлефон для даведак: (8 017) 293 27 16.