Дата правядзення
Час правядзення
Месца правядзення
21 мая спаўняецца 550 гадоў з дня нараджэння вялікага нямецкага мастака, графіка, тэарэтыка мастацтва Альбрэхта Дзюрэра (1471–1528), творчасці якога прысвечана юбілейная выстаўка “Вызваленне духу”.
Майстар жыў і тварыў у час Рэфармацыі і Вялікай сялянскай вайны. Шматлікія таленавітыя навукоўцы, пісьменнікі, мастакі таго часу шукалі новыя шляхі развіцця навукі і культуры. Альбрэхт Дзюрэр быў тым дзеячам эпохі, які імкнуўся вызваліць чалавечы дух ад кайданоў рэлігійных догматаў.
Шматграннасць таленту, шырата інтарэсаў і рознабаковыя веды дазволілі А. Дзюрэру стаць найбуйнейшым еўрапейскім майстрам гравюры, першым тэарэтыкам мастацтва сярод паўночнаеўрапейскіх мастакоў, аўтарам практычнага кіраўніцтва па выяўленчым і дэкаратыўна-прыкладным мастацтве, заснавальнікам параўнальнай антрапаметрыі, вывучаць матэматыку, астраномію, оптыку, геаграфію і пісаць вершы. Ён пакінуў заўважны след і ў вайскова-інжынернай справе, і ў развіцці друкаванай кніжнай графікі.
Мэта выстаўкі – аддаць даніну павагі бліскучаму майстру Рэнесансу, нагадаць наведвальнікам аб рознабаковых дасягненнях мастака, зацікавіць чытачоў творамі аўтара. У экспазіцыі прадстаўлены навукова-папулярныя выданні, прысвечаныя яго жыццю і творчасці, даследаванні рукапіснай спадчыны мастака – яго лістоў, дзённікаў, аўтабіяграфіі. Выдзяляюцца выданні, прысвечаныя Дзюрэру як навукоўцу, перавыданні і пераклады тэарэтычных трактатаў аўтара па вымярэнні, прапорцыі, шрыфтах, фартыфікацыі. Дэманструюцца працы, прысвечаныя вывучэнню асобных выяўленчых тэм і твораў, а таксама мастацкія альбомы і рэпрадукцыі малюнкаў, жывапісных і графічных работ вялікага майстра. Сярод іх – перавыданне знакамітага зборніка італьянскага жывапісца, архітэктара і пісьменніка Дж. Вазары “Жаццяпісы”, у якім аўтар адным з першых звяртаецца да графічнай творчасці мастака; даследаванне малюнкаў А. Дзюрэра французскага мастацтвазнаўцы, мастацкага крытыка і мецэната Ш. Эфрусі канца ХІХ ст.; аўтарытэтныя выданні Ц.Г. Несельштраус, Э. Ульмана, М. Брыёна, Э. Панофскі і інш. Экспануюцца рэпрадукцыі самых вядомых і значных жывапісных партрэтаў, малюнкаў, узоры краявідаў, асобныя творы з графічных серый, “майстэрскія гравюры”, перавыданні знакамітых дрэварытаў да твора С. Бранта “Карабель дурняў”, рэпрадукцыі гербаў і экслібрысаў, створаных мастаком.
Арыгінальныя першадрукі ХV – першай паловы XVI ст., звязаныя з творчай спадчынай А. Дзюрэра, прадстаўлены ў музеі кнігі. Гэта такія знакамітыя выданні, як “Сусветная хроніка” Г. Шэдэля (Нюрнберг, 1493) і “Зборы твораў святога Амвросія Медыяланскага” (Базель, 1492) з першымі дрэварытамі А. Дзюрэра. Гравіраваная выява друкарскай маркі парыжскага выдаўца Ё. Бадзіуса і асобныя работы мастакоў-гравёраў майстэрні А. Дзюрэра змешчаны ў выданні лістоў італьянскага філолага і паэта Паліцыяна (1526), зборах твораў манашкі Хросвіты Гандэрсгеймскай (Нюрнберг, 1501) і Цыцэрона (Аўгсбург, 1531).
Творчая спадчына Дзюрэра з’яўляецца неацэнным унёскам у развіццё чалавечай цывілізацыі, якая натхняе і здзіўляе мастакоў і аматараў ідэальных кампазіцый, складаных сэнсавых сюжэтаў, вытанчанай і дасканалай манеры выканання больш за пяць стагоддзяў.
Выстаўка, размешчаная ў кальцавым калідоры 3-га паверха і музеі кнігі (пам. 347), працуе з 21 мая да 30 верасня 2021 г.
Дата яе заканчэння можа быць зменена.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Прадстаўленыя ў экспазіцыі кнігі можна заказаць праз электронны каталог Нацыянальнай бібліятэкі Беларусі.
Тэлефон для даведак: (8 017) 293 29 80.
Матэрыял пададзены аддзелам галерэйна-выставачнай дзейнасці.