Храмы часу, памяці, думкі

Напярэдадні юбілейнага года святкавання стагоддзя Нацыянальнай бібліятэкі Беларусі да прафесійнага свята – Дня бібліятэк Беларусі – прымеркавана выстаўка “Храмы часу, памяці, думкі”.

Як сведчаць архіўныя дакументы, галоўная бібліятэка краіны, спачатку створаная пры Беларускім дзяржаўным універсітэце, актыўна фарміравалася на працягу 1921 г. Пастановай Урада БССР ад 15 верасня 1922 г. яна была афіцыйна абвешчана Беларускай дзяржаўнай і ўніверсітэцкай бібліятэкай. Гэты дзень і лічыцца днём заснавання Нацыянальнай бібліятэкі Беларусі, а з 2001 г. адзначаецца як агульнадзяржаўны Дзень бібліятэк.

За амаль стогадовую гісторыю галоўная бібліятэка краіны змяніла некалькі адрасоў. Сёння будынак Нацыянальнай бібліятэкі ўяўляе сабой велічнае інжынернае і архітэктурнае збудаванне, узведзенае ў адпаведнасці з найноўшымі навукова-тэхнічнымі распрацоўкамі, не ўступае па аснашчанасці буйнейшым нацыянальным бібліятэкам свету і з’яўляецца буйнейшым інфармацыйным і сацыякультурным цэнтрам краіны.

На выстаўцы, прымеркаванай да прафесійнага свята бібліятэк Беларусі, прадстаўлена больш за 50 дакументаў: юбілейныя фотаальбомы, кнігі і электронныя выданні па гісторыі развіцця галоўнай бібліятэкі краіны, выяўленчыя матэрыялы. Упершыню экспануецца ўнікальная калекцыя фотадакументаў з фонду Нацыянальнай бібліятэкі Беларусі, якая дапаможа наведвальнікам праз фотавыявы трапіць у будынак Дзяржаўнай бібліятэкі па вуліцы Чырвонаармейскай, прагуляцца па яе залах, адчуць атмасферу, якая стваралася калектывам добразычлівых кампетэнтных прафесіяналаў, кожны з якіх пакінуў тут часцінку сваёй душы.

Экспазіцыя размешчана на 2-м паверсе кальцавога калідора і будзе доўжыцца з 14 верасня па 30 лістапада.

Тэлефон для даведак: (8 017) 293 29 80.