Краявіды Гродзенскай пушчы ў Нацыянальнай бібліятэцы Беларусі

23 снежня ў галерэі “Панарама” (22-гі паверх) адбудзецца адкрыццё фотавыстаўкі “Зялёны позірк”.

Фотавыстаўка пазнаёміць гледача з унікальнай і разнастайнай флорай і фаўнай Рэспубліканскага ландшафтнага заказніка «Гродзенская пушча» – аднаго з найбольш экалагічна чыстых месцаў у Беларусі.

У экспазіцыі – лясныя і лугавыя экасістэмы, рэдкія расліны, занесеныя ў Чырвоную кнігу Рэспублікі Беларусь, чароўныя віды з вышыні птушынага палёту на захапляльныя панарамы ракі Нёман і яе прытокаў, рэк Чорная Ганча, Асташанка і Ласасянка. Не пакінуць абыякавымі гледачоў і здымкі Аўгустоўскага канала.

Аўтары – Сяргей Плыткевіч, Дзмітрый Гурыновіч, Наталля і Сяргей Марозавы – дзеляцца з гледачамі фотапозіркамі на ўнікальныя прыродныя аб’екты Беларусі. Іх работы ўражваюць сваёй яркасцю, сакавітасцю і натуральнасцю момантаў, маштабнасцю панарам і разнастайнасцю краявідаў.

Прадстаўленыя ў экспазіцыі фотаздымкі – вынік плённай працы ўдзельнікаў праекта-экспедыцыі “Зялёны позірк” па рэках Гродзенскай пушчы. Асноўнай мэтай выстаўкі з’яўляецца жаданне прыцягнуць увагу да прыродаахоўнай тэрыторыі, заахвоціць гледачоў берагчы і паважаць прыродную спадчыну Беларусі, даць магчымасць ёю налюбавацца.

Аўтарам ідэі праекта-экспедыцыі выступіў старшыня гродзенскага абласнога аддзялення Рэспубліканскага турысцка-спартыўнага саюза Сяргей Каляда. Куратар выстаўкі “Зялёны позірк” – вядомы беларускі фотамастак Сяргей Плыткевіч.

Выстаўка “Зялёны позірк” экспануецца ў Мінску ўпершыню.

На адкрыццё ўваход вольны, у астатні час наведванне экспазіцыі ўваходзіць у кошт наведвання агляднай пляцоўкі.
Час работы выстаўкі адпавядае рэжыму работы агляднай пляцоўкі.

Выстаўка будзе працаваць да 20 сакавіка 2022 г.
Дата заканчэння працы экспазіцыі можа быць зменена.

Тэлефон для даведак: (8 017) 293 28 81.