Дата правядзення
Час правядзення
Месца правядзення
21 красавіка ў Нацыянальнай бібліятэцы Беларусі пройдуць мерапрыемствы, прысвечаныя Сусветнаму дню кнігі і аўтарскага права, а таксама Міжнароднаму дню інтэлектуальнай уласнасці.
У 10.00 адбудзецца адукацыйны семінар “Абарона персанальных даных: рэаліі для бібліятэчнай супольнасці” (рэгістрацыя).
У семінары возьмуць удзел прадстаўнікі Нацыянальнага цэнтра абароны персанальных даных Рэспублікі Беларусь, а таксама кіраўнікі і спецыялісты бібліятэк і іншых інфармацыйных устаноў краіны.
У 15.00 у галерэі “Атрыум” (2-гі паверх) пройдзе культурна-асветніцкая акцыя “Майстры беларускай культуры. Уладзімір Правідохін”, прысвечаная творчасці мастака. Падчас мерапрыемства адбудзецца перадача праў на выкарыстанне лічбавых копій яго твораў у інфармацыйных рэсурсах Нацыянальнай бібліятэкі Беларусі.
Уладзімір Андрэевіч Правідохін (Уладзімір Хін) – вядомы беларускі мастак, член Беларускага саюза мастакоў. Яго работы захоўваюцца ў Нацыянальным мастацкім музеі Рэспублікі Беларусь, Нацыянальнай бібліятэцы Беларусі, Музеі Марка Шагала ў Віцебску, Полацкім гісторыка-культурным музеі-запаведніку, а таксама ў музеях Расіі, ЗША, Германіі, у прыватных калекцыях Францыі, Ізраіля, Швейцарыі.
На мерапрыемстве адбудзецца прэзентацыя электроннага рэсурсу “Майстры беларускай культуры. Уладзімір Правідохін”, дзе сабраны электронныя копіі ўнікальных эстампаў, плакатаў і іншых твораў вядомага мастака-графіка.
Для наведвальнікаў будзе арганізавана выстава-прагляд, якая дазволіць бліжэй пазнаёміцца з жыццём і творчасцю Уладзіміра Правідохіна.
Матэрыял пададзены аддзелам фарміравання электроннай бібліятэкі.
