Дата правядзення
Час правядзення
Месца правядзення
Нацыянальная бібліятэка Беларусі працягвае цыкл майстар-класаў з вядомымі народнымі майстрамі Беларусі ў межах выставачнага праекта “Жывыя крыніцы”, прымеркаванага да Года гістарычнай памяці.
21 красавіка а 16-й гадзіне ў выставачным комплексе (пам. 104) адбудзецца сустрэча з дыпламантам фестываляў і свят, сябрам Беларускага саюза майстроў народнай творчасці Наталляй Гамаюнавай па вырабе паштоўкі ў тэхніцы “выцінанка”.
Адзін з відаў самабытнага народнага дэкаратыўна-прыкладнога мастацтва – выцінанка – быў распаўсюджаны ў народным побыце ў канцы ХІХ – пачатку ХХ ст. Беларускія выцінанкі былі пераважна аднаколернымі, а іх малюнак залежаў ад прызначэння вырабу, фантазіі, умення аўтара і ад рэгіёна, у якім ён жыў. Сучасная беларуская выцінанка характарызуецца багатай тэматыкай, разнастайнай тэхнікай выканання, арыгінальнымі дызайнерскімі рашэннямі, але заўсёды пры гэтым арыентуецца на традыцыйныя народныя матывы.
На майстар-класе наведвальнікі змогуць зрабіць арыгінальную паштоўку ў чароўнай тэхніцы дэкаратыўна-прыкладнога мастацтва. Сапраўдны цуд можна стварыць сваімі рукамі, уклаўшы ў рукадзелле крышачку душэўнага цяпла. Зробленая ўласнаручна незвычайная паштоўка ўпрыгожыць любы падарунак.
Наведванне майстар-класа ўваходзіць у кошт наведвання выставы “Жывыя крыніцы”:
- для дарослых – 6 рублёў;
- для навучэнцаў сярэдніх, сярэднеспецыяльных і вышэйшых устаноў – 3 рублі;
- сямейны квіток (2 дарослых з дзіцём да 16 гадоў) – 11 рублёў;
- сямейны квіток (2 дарослых з 2 дзецьмі да 16 гадоў) – 13 рублёў;
- шматдзетныя сем’і (пры прад'яўленні дакумента) – 13 рублёў.
- дзеці да 7 гадоў і выхаванцы дзіцячых дамоў, людзі з абмежаванымі магчымасцямі (пры прад’яўленні дакумента);
- суправаджаючыя груп школьнікаў, выхаванцаў устаноў адукацыі (1 чалавек на 10 дзяцей).
Час работы выстаўкі адпавядае рэжыму работы бібліятэкі.
Тэлефон для даведак: (8 017) 293 27 50.
Матэрыял падрыхтаваны аддзелам сувязей з грамадскасцю.