З пачатку 1990-х гг. Нацыянальная бібліятэка Беларусі пачала ўносіць свой пасільны ўклад у справу інфармавання насельніцтва краіны аб дакументах і матэрыялах па ўсіх аспектах чарнобыльскай праблематыкі.
З часу гэтай найбуйнейшай у свеце тэхнагеннай катастрофы, якая адбылася 26 красавіка 1986 г., мінула ўжо 34 гады. Аварыя стала болем, агульнай бядою, нацыянальным бедствам для Беларусі. У зону радыеактыўнага забруджвання трапіла больш за 2,7 тыс. населеных пунктаў, з абароту былі выведзены тысячы гектараў сельскагаспадарчых палеткаў. Жыццё многіх беларускiх сем’яў аказалася падзеленым на “да” i “пасля” гэтага страшэннага бедства. Аварыя падарвала здароўе беларусаў, паламала мноства лёсаў, зрабіла людзей вымушанымі бежанцамі.
Уздзеянне чарнобыльскай катастрофы на экалогію паставіла Беларусь перад неабходнасцю вырашэння новых, выключна складаных і буйнамаштабных праблем, якія датычыліся практычна ўсіх сфер грамадскага жыцця, многіх аспектаў навукі і вытворчасці, культуры і маралі. Практычная работа па пераадоленні медыцынскіх, экалагічных, сацыяльна-псіхалагічных і эканамічных наступстваў чарнобыльскай катастрофы і па сённяшні дзень застаецца ў цэнтры ўвагі.
Нацыянальнай бібліятэкай Беларусі ў 1993 г. была створана і на працягу амаль 15 год папаўнялася база даных “Чарнобыль”, у якой можна знайсці падрабязную бібліяграфічную інфармацыю па чарнобыльскай тэматыцы. На аснове базы даных фарміраваліся аднайменныя навукова-дапаможныя паказальнікі за 1991, 1992, 1993, 1994, 1995–1997, 1998–2000, 2001, 2002, 2003, 2004 гг. З 2007 г. звесткі аб дакументах, прысвечаных гэтай тэме, адлюстроўваюцца ў базе даных “Беларусь: ад мінулага да сучаснага”. Да 20-годдзя чарнобыльскай катастрофы былі падрыхтаваны адпаведныя бібліяграфічныя матэрыялы (“Новыя кнігі: па старонках беларускага друку”, 2006, № 3, дадатак; CD-ROM “Чарнобыль”, 2006). Тэкставы матэрыял можна знайсці таксама ў беларусазнаўчай фактаграфічнай базе даных “Беларусь у асобах і падзеях”.
Матэрыял прадастаўлены навукова-даследчым аддзелам бібліяграфіі.