У год юбілею Вялікай Перамогі віртуальная чытальная зала Нацыянальнай бібліятэкі Беларусі працягвае прэзентацыю лепшых электронных рэсурсаў публічных бібліятэк.
Інфармацыйны рэсурс Цэнтралізаванай бібліятэчнай сеткі Быхаўскага раёна Магілёўскай вобласці “Іх мужнасць і подзвіг – нам прыклад” прысвечаны адной з гераічных старонак партызанскага летапісу Беларусі ў гады Вялікай Айчыннай вайны.
На сайце прадстаўлена інфармацыя пра баявы шлях асаблівага рэйдавага партызанскага палка “Трынаццаць”, які змагаўся з ворагам на Смаленшчыне, Магілёўшчыне, Віцебшчыне і Міншчыне, і адной з самых кровапралітных і трагічных падзей партызанскай барацьбы з фашыстамі – прарыве блакады ў прыфрантавым Боўкінскім лесе Быхаўскага раёна ў кастрычніку 1943 года.
Матэрыялы рэсурсу распавядаюць пра гераічных удзельнікаў партызанскага фарміравання і ўвекавечанні іх подзвігу праз Курган Бессмяротнасці, узведзены жыхарамі Быхаўскага раёна на месцы ваенных дзеянняў.
Азнаёміцца з рэсурсам можна ў віртуальнай чытальнай зале і ў раздзеле “Рэсурсы бібліятэк” вэб-навігатара “Беларусь у інфармацыйнай прасторы”.
Матэрыял прадстаўлены аддзелам карпаратыўнага ўзаемадзеяння.
