22 снежня адбылася анлайн-прэзентацыя новага рэсурсу Нацыянальнай бібліятэкі Беларусі “Рукапісы сучасных беларускіх аўтараў з фондаў Нацыянальнай бібліятэкі Беларусі”.
Прэзентацыю правёў стваральнік рэсурсу Віктар Пшыбытка, начальнік цэнтра аблічбоўкі і забеспячэння захаванасці бібліятэчных дакументаў. Ён пазнаёміў прысутных са зместам і функцыянальнымі магчымасцямі калекцыі, прадэманстраваў асаблівасці пошуку і працы з дакументамі.
У рэсурсе прадстаўлена больш за 600 лічбавых копій музычных твораў больш за 100 сучасных беларускіх кампазітараў і паэтаў, якія заключылі з бібліятэкай аўтарскія дагаворы, дзе яны дазволілі выкарыстанне сваіх твораў з дапамогай прайгравання, распаўсюджвання, паведамлення для ўсеагульнага ведама.
Рэсурс будзе карысны гісторыкам, музыказнаўцам, выкладчыкам, студэнтам, навучэнцам адукацыйных устаноў і ўсім, хто цікавіцца беларускай музыкай на сучасным этапе.
У мерапрыемстве прынялі ўдзел спецыялісты і кіраўнікі бібліятэк, устаноў адукацыі, прафесійныя выканаўцы і аматары музыкі.
Матэрыял пададзены цэнтрам алічбоўкі і забеспячэння захаванасці бібліятэчных дакументаў.