Напярэдадні святкавання 75-годдзя перамогі ў Вялікай Айчыннай вайне Нацыянальная бібліятэка Беларусі прадстаўляе новы інтэрнэт-праект – сайт “Падпольны і партызанскі друк Беларусі”.
Рэсурс уяўляе сабой электронную бібліятэку дакументаў, створаных падпольнымі і партызанскімі атрадамі, з фондаў Нацыянальнай бібліятэкі Беларусі, Беларускага дзяржаўнага музея гісторыі Вялікай Айчыннай вайны і Нацыянальнага архіва Рэспублікі Беларусь. Дадзеная электронная бібліятэка пастаянна папаўняецца.
Сайт налічвае каля 100 найменняў газет, больш за 1 000 іх выпускаў, каля 150 лістовак і рукапісных матэрыялаў. Дакументы ўяўляюць вялікую цікавасць для даследчыкаў, дазваляюць вывучаць гісторыю партызанскага руху ў Беларусі, жыццё краіны на акупіраванай тэрыторыі. Дзякуючы праекту чытач зможа ўбачыць на ўласныя вочы бясспрэчныя сведчанні гісторыі і прыняць непасрэдны ўдзел у папаўненні калекцыі электроннымі копіямі дакументаў ваеннага перыяду з асабістых архіваў.
Інтэрнэт-праект “Падпольны і партызанскі друк Беларусі” дазволіць узнавіць і захаваць гісторыю ўсенароднага подзвігу, а таксама далучыць да яе шырокую аўдыторыю.
Матэрыял прадастаўлены аддзелам суправаджэння інтэрнэт-партала.