Чытачы Нацыянальнай бібліятэкі маюць магчымасць дыстанцыйна атрымаць доступ да ліцэнзійных электронных рэсурсаў вядучых выдавецтваў па розных галінах ведаў. Гэта істотна дапаможа ў аддаленай адукацыйнай і навуковай дзейнасці.
Нотная калекцыя ЭБС “БиблиоРоссика” зацікавіць як прафесіяналаў, так і аматараў музычнага мастацтва. Яна ўключае творы для фартэпіяна і інструментальных ансамбляў, народныя і эстрадныя песні, рамансы, партытуры, опер і твораў для аркестра з фонду ЦГПБ імя У.У. Маякоўскага. Сярод аўтараў – І.С. Бах, М. Балакіраў, Р. Вагнер, М. Мусаргскі, А. Скрабін і многія іншыя. Рэтраспектыва выданняў – з 1894 года.
Манаграфіі па гісторыі і тэорыі музыкі, зборнікі вучэбна-педагагічнага рэпертуару і сальфеджыа для музычных школ, вучэбна-метадычная літаратура для студэнтаў, зборнікі і асобныя творы для розных інструментаў, аркестравыя, ансамблевыя і харавыя партытуры, песні і рамансы прадстаўлены ў ЭБС “Знаниум” у такіх раздзелах: віды музыкі і музычнага выканання; лібрэта і тэксты да музычных твораў; музычная педагогіка, выканальніцтва; нотныя выданні; творчыя біяграфіі, успаміны; тэорыя і гісторыя музыкі, музыказнаўства.
Дырыжыраванне, інструментальнае выканальніцтва, гісторыя музыкі, кнігі пра музыку і музыкантаў, музыка сучаснага Пецярбурга, музычная педагогіка, музычныя творы, вакал, дапаможнікі для самастойнага навучання – вось няпоўны пералік тэматыкі кніг і часопісаў, прадстаўленых у ЭБС “Лань” і даступных для дыстанцыйнага вывучэння.
Каб працаваць з поўнымі тэкстамі электронных выданняў дома, неабходна зарэгістравацца на электронных платформах. Зрабіць гэта вам дапамогуць невялікія інструкцыі:
- Як зарэгістравацца ў ЭБС “Лань”
- Як зарэгістравацца ў ЭБС “Znanium”
- Як зарэгістравацца ў ЭБС “БиблиоРоссика”
Інфармацыя аб ліцэнзійных электронных рэсурсах і магчымасцях выдаленай працы з імі, рэсурсах адкрытага доступу, а таксама рэсурсах, якія ствараюцца Нацыянальнай бібліятэкай, даступна ў раздзеле "Электронныя інфармацыйныя рэсурсы".
Зычым плённай вучобы і працы!
Матэрыял прадастаўлены аддзелам карпаратыўнага ўзаемадзеяння.
