BelBookChallenge набірае абароты, а вы ніяк не можаце за ім угнацца?
Па шматлікіх просьбах удзельнікаў BelBookChallenge падаўжаецца яшчэ на месяц – да 6 сакавіка ўключна. Выдатны шанец нагнаць упушчанае або нават пачаць чэлендж! Чым не выклік самому сабе?
А пакуль, каб заахвоціць усіх, хто ўжо пачаў гэтую кніжную гонку, 11 лютага мы падвядзём прамежкавыя вынікі чэленджу! У рэшце рэшт, некаторыя з вас так актыўна пісалі рэцэнзіі, што ўжо цяпер заслугоўваюць узнагароды за сваю ўпартасць. І, вядома, мы не можам пакінуць без прыза ўсіх тых, каго ў BelBookChallenge прывабіў асаблівы падарунак ад Літаратурнага музея Петруся Броўкі.
Адзін з удзельнікаў, чые рэцэнзіі найбольш уразяць супрацоўнікаў музея, атрымае гэты незвычайны прыз – сапраўдны чароўны вечар “Музей для дваіх” у Дзень усіх закаханых! Атмасфера невымоўнай рамантыкі ў пустым музеі, жывая музыка і ўсё, пра што толькі можна марыць. Павабна? Тады уключайцеся ў напісанне рэцэнзій! Калі ўвесь гэты час вы актыўна чыталі кнігі, але баяліся або ленаваліся пакідаць на іх водгукі, настаў ваш час пісаць.
Чытайце кнігі па тэмах чэленджу, пішыце рэцэнзіі і публікуйце іх у сацсетках з хэштэгам #BelBookChallenge – вось і ўвесь рэцэпт!
