Завяршыўся II этап рэспубліканскага творчага конкурсу буктрейлеров “Кніга з экрана”, прысвечанага тэме малой Радзімы. Адзначым: адной з прыярытэтных задач на гэтым этапе конкурсу з’яўляецца папулярызацыя беларускай літаратуры.
Сярод школьнікаў лепшым аказаўся творчы калектыў Мачулішчанскай сярэдняй школы імя І. Удавенкі і М. Гаманенкі. Адзначыла журы таксама работы творчай суполкі політэхнічнага каледжа-філіяла БрДТУ і Вікторыі Шыла (БНТУ).
Мы выбралі самыя цікавыя, на наш погляд, работы, якімі хочам падзяліцца з карыстальнікамі сайта.
Максім Рэпкін (РУП “Гроднаэнерга «Лідскія электрычныя сеткі» ”), які стаў адным з лаўрэатаў I этапу конкурсу, на гэты раз у дынамічнай і цікавай манеры рэкламуе прыгодніцкую аповесць Янкі Маўра “Палескія рабінзоны”:
Сярод вучнёўскай моладзі асаблівым шармам вылучаецца ролік студэнткі БНТУ Вікторыі Шыла, прысвечаны краязнаўчаму выданню В.П. Крукоўскага “Чаму мяне так завуць”:
А Кацярыну Менча (Баранавіцкі прафесійна-тэхнічны каледж сферы абслугоўвання) зацікавіла кніга А.І. Бутэвіча “Таямніцы Нясвіжскага замка”:
Маргарыта Герасімава, вучаніца СШ №11 г. Наваполацка, сабрала значны ілюстрацыйны матэрыял для буктрейлера да рамана Івана Шамякіна “Злая зорка”:
У другім туры конкурсу буктрейлеров удзельнічала 56 работ. Усе аўтары – з уласным бачаннем любімай кнігі і жаданнем падзяліцца ўражаннем з іншымі чытачамі. Узнагароджанне пераможцаў першага і другога конкурсных тураў запланавана на Дзень беларускага пісьменства, які сёлета будзе адзначацца ў Бялынічах.
Матэрыял падрыхтаваны аддзелам суправаджэння інтэрнэт-партала.