Аўтографы Андрэя Александровіча

Працягваем знаёміць карыстальнікаў з новымі старонкамі віртуальнага праекта “На хвалі часу, у плыні жыцця”, які “жыве”, бо праца над ім не спыняецца.

Ужо поўным ходам ідзе падрыхтоўка раздзела да 135-годдзя Змітрака Бядулі, але рэсурсы, створаныя раней, таксама папаўняюцца новымі матэрыяламі. Хутка ўвазе даследчыкаў будзе прадстаўлены цэлы шэраг дакументаў з архіва Алега Радаслававіча Александровіча, унука паэта Андрэя Александровіча, да 115-годдзя якога Нацыянальная бібліятэка стварыла асобны раздзел праекта і зладзіла яго віртуальную прэзентацыю. Падчас падрыхтоўкі супрацоўнікі шмат працавалі ў фондах бібліятэкі з кніжнымі выданнямі пісьменніка і знайшлі ў іх аўтографы “маладнякоўца”, убачыць якія цяпер ёсць магчымасць у кожнага.

Аўтографы размешчаны ў другім раздзеле “З дэвізам свайго пакалення: творчая спадчына Андрэя Александровіча”. Два з іх прызначаны Уладзіміру Андрэевічу Сутырыну (1902–1985), савецкаму пісьменніку, сцэнарысту, кінадраматургу, літаратурнаму крытыку, які з 1928 па 1932 год працаваў на пасадзе генеральнага сакратара Усесаюзнага аб’яднання Асацыяцый пралетарскіх пісьменнікаў. Аўтографы былі знойдзены ў творах А. Александровіча 1930-х гадоў – паэме “Цені на сонцы” і “Паэме імя вызвалення”.

Аўтограф А. Александровіча ў кнізе “Паэма імя вызвалення” (1930).
Шыфр НББ: Ба68663

Адзін з аўтографаў прысвечаны пісьменніку Сяргею Грахоўскаму, з якім на працягу доўгага часу, з маладосці і да скону, сябраваў А. Александровіч. Сяргей Іванавіч пакінуў успаміны пра паэта, дзе пісаў:

“Я часта гартаю яго кнігі з аўтографамі і тыя, што выйшлі ў апошнія гады. Не ўсё ў іх вытрымала выпрабаванне часам. Але ў кожным значным творы гучыць жывы шчыры голас паэта, які ішоў у нагу з часам, які трымаў руку на пульсе жыцця”.

Аўтограф А. Александровіча ў кнізе “Шчаслівая дарога” (1958).
Шыфр НББ: Ба57881

Кнігі А. Александровіча захоўваюцца ў фондах Нацыянальнай бібліятэкі, кожнае выданне можна замовіць па электронным каталогу, а паэма “Цені на сонцы” (1930) з аўтографам пісьменніка прадстаўлена ў алічбаваным варыянце.

Больш падрабязна з інфармацыяй па тэме можна пазнаёміцца ў раздзеле, прысвечаным Андрэю Іванавічу Александровічу, у рамках віртуальнага праекта “На хвалі часу, у плыні жыцця”.

Чытайце таксама: Новыя матэрыялы пра Андрэя Александровіча