Поўным ходам ідзе літаратурны конкурс “Беларускі салавей” да 135-годдзя з дня нараджэння Змітрака Бядулі. Ініцыятыва ажыццяўляецца Нацыянальнай бібліятэкай з 1 па 31 кастрычніка ў межах віртуальнага праекта “На хвалі часу, у плыні жыцця”.
За тры тыдні ў творчым спаборніцтве ўжо паўдзельнічала 205 чалавек! Для нашых удзельнікаў і ўсіх зацікаўленых мы падрыхтавалі новыя цікавосткі конкурсу.
Рады паведаміць, што ў нас з’явіўся першы замежны ўдзельнік з Расіі – гэта Юлія Багатырова, вучаніца 11 класа МБАУ “Сярэдняя агульнаадукацыйная школа № 1” горада Кірсанава Тамбоўскай вобласці, якая падрыхтавала prequel “Першыя Каляды з маці”.
Прыемна, што на прапанову аргкамітэту даслаць аўдыязапіс свайго эсэ ва ўласным выкананні адгукнуліся ўжо 2 удзельнікі конкурсу – Марк Камісараў – вучань 7 класа ДУА “Гімназія № 3 г. Барысава”, які прадставіў sequel “Недзе высока-высока ў небе…” па творы “На Каляды к сыну”, а таксама Дар’я Герасімовіч – вучаніца 9 класа ДУА “Сярэдняя школа № 1 г. Фаніпаля”, аўтар эсэ “Спадзяванне” (“На Каляды к сыну”; sequel). Чакаем аўдыязапісаў і ад іншых канкурсантаў.
Інфармуем удзельнікаў, што на мінулым тыдні сябрамі аргкамітэту была створана старонка конкурсу ў Instagram “Маладняк – першае літаратурнае аб’яднанне Беларусі”, дзе размяшчаюцца фрагменты з твораў нашых канкурсантаў. Далучайцеся! Акрамя гэтага з працамі можна знаёміцца і ў аднайменнай суполцы на facebook, у якой на сённяшні дзень ужо 979 падпісчыкаў.
Пакуль удзельнікі чытаюць творы Змітрака Бядулі, пішуць і дасылаюць нам свае працы, аргкамітэт таксама актыўна працуе, папулярызуе конкурс у СМI, распаўсюджвае інфармацыю ў культурнай прасторы. Напрыклад, на мінулым тыдні сябры аргкамітэту далі інтэрв’ю партнёру творчага спаборніцтва – каналу “Культура” Беларускага радыё, у якім распавялі пра “Дзённікі конкурсу”, яго асаблівасці і ўдзельнікаў.
Прыём прац працягнецца да 31 кастрычніка ўключна, шчыра запрашаем усіх зацікаўленых, дзяцей і дарослых, вучняў, студэнтаў і настаўнікаў, нашых калег з Нацыянальнай бібліятэкі і іншых бібліятэк Беларусі, а таксама замежных удзельнікаў далучыцца да нашай творчай ініцыятывы!
Матэрыял пададзены інфармацыйна-аналітычным аддзелам.