З 1 па 31 кастрычніка ў гонар 135-годдзя з дня нараджэння Змітрака Бядулі Нацыянальная бібліятэка праводзіць літаратурны конкурс “Беларускі салавей”, які ладзіцца ў межах віртуальнага праекта “На хвалі часу, у плыні жыцця”. Аргкамітэт падрыхтаваў для ўдзельнікаў шэраг цікавых навін і паведамленняў.
Прыемна адзначыць, што конкурс толькі пачаўся, а мы ўжо атрымалі 45 творчых прац! Першай з іх стала эсэ “Боль маці, пакрыўджанай адзіным сынам” Міхаіла Сафронава, вучня 8 класа ДУА “Хільчыцкі дзіцячы сад – сярэдняя школа” (Жыткавіцкі р-н, Гомельская вобл.). Такім чынам, літаратурную ініцыятыву можна лічыць адкрытай!
Рады паведаміць, што да нашага конкурсу далучыліся новыя інфармацыйныя партнёры: канал “Культура” Беларускага радыё і радыёстанцыя “Цэнтр FM”, якія зацікавіліся літаратурнай ініцыятывай і гатовыя падтрымаць яе.
У працэсе падрыхтоўкі конкурсу ў аргкамітэта ўзнікла прапанова да ўдзельнікаў пры жаданні разам з анкетай і тэкстам работы дасылаць аўдыязапіс свайго эсэ ва ўласным выкананні. Гарантуем, што такія працы абавязкова будуць адзначаны ў адпаведнай намінацыі.
Творчасць Змітрака Бядулі выклікае цікавасць не толькі ў нашых суайчыннікаў, але і ў грамадзян іншых краін, таму літаратурны конкурс “Беларускі салавей” паступова набірае папулярнасць. У сувязі з гэтым, аргкамітэт прыняў рашэнне дапускаць да ўдзелу творчыя працы, створаныя на тэрыторыі іншых краін на рускай мове. Кожная праца для нас важная!
Творы ўдзельнікаў конкурсу размяшчаюцца ў нашай суполцы на Facebook “Маладняк – першае літаратурнае аб’яднанне Беларусі”. Але, каб пазбегнуць сюжэтных паўтораў у працах і плагіяту, падаюцца толькі іх фрагменты.
Запрашаем да ўдзелу ў нашай ініцыятыве ўсіх жадаючых!
Тэлефоны для даведак: (8 017) 293 27 19, 293 29 69, 293 27 43.
Увага: просім удзельнікаў дасылаць свае фотаздымкі не ў анкеце, а асобным файлам у фармаце jpg, гэта патрэбна для размяшчэння на Facebook. Дасылайце на konkurs.nlb@gmail.com.
Матэрыял пададзены інфармацыйна-аналітычным аддзелам.
