Віртуальны праект “На хвалі часу, у плыні жыцця” прадстаўляе новыя матэрыялы і знаходкі. 22 студзеня ў Нацыянальнай бібліятэцы адбылася віртуальная прэзентацыя літаратурнай спадчыны Андрэя Александровіча, прымеркаваная да 115-годдзя з дня нараджэння пісьменніка. Але праца над віртуальным раздзелам, прысвечаным яго жыццю і творчасці, працягваецца. У хуткім часе даследчыкаў чакае цэлы шэраг каштоўных дакументаў і фотаздымкаў “маладнякоўца”!
Супрацоўнікі бібліятэкі наладзілі сувязь з унукам пісьменніка Алегам Александровічам, які жыве ў Польшчы. Алег Радаслававіч шчыра дзякаваў за ўшанаванне памяці свайго дзеда і адзначаў, што нарэшце з’явілася прафесійная цікавасць да асобы пісьменніка. Для яго вельмі важна, каб спадчына Андрэя Александровіча стала даступнай для навукоўцаў, даследчыкаў і чытачоў. З гэтай мэтай некалькі гадоў назад ён стварыў старонку ў Вікіпедыі пра дзеда, дзе прадстаўлены алічбаваныя матэрыялы. Літаральна на мінулым тыдні Алег Радаслававіч даслаў супрацоўнікам бібліятэкі амаль увесь свой архіў! Тут і рукапісы, і каштоўныя дакументы, і лісты, і неапублікаваныя вершы, шэраг машынапісных артыкулаў Андрэя Александровіча з яго паметкамі, а таксама цэлая галерэя фотаздымкаў пісьменніка і яго родных.
Алеся і Андрэй Александровічы. 1910 г.
А. Александровіч. Санаторый імя Герцэна пад Масквой. 1960 г.
Пасведчанне А. Александровіча пра абранне членам-карэспандэнтам Акадэміі навук БССР. 1936 г.
Нататкі А. Александровіча пра паэму “Цені на сонцы”. Рукапіс. Стар. 1. 1955 г.
Але і гэта яшчэ не ўсё: з дазволу Алега Радаслававіча значная частка гэтых матэрыялаў будзе далучана ў віртуальны раздзел, прысвечаны Андрэю Александровічу.
Не прапусціце нашы навіны і абнаўленні. Жыццё праекта працягваецца і наперадзе вас чакае не менш цікавае!
Матэрыял пададзены інфармацыйна-аналітычным аддзелам.
