Працягваем знаёміць вас з цікавосткамі віртуальнага праекта “На хвалі часу, у плыні жыцця”. У лістападзе да дня нараджэння беларускага пісьменніка, крытыка, сябра літаратурнага аб’яднання “Маладняк” Яна Скрыгана мы ўключылі ў прысвечаны яму віртуальны раздзел новыя матэрыялы.
16 лістапада мы адзначаем дзень нараджэння Яна (Івана Аляксеевіча) Скрыгана (1905–1992). Прысвечаны яму віртуальны раздзел папоўніўся электроннай копіяй буклета, падрыхтаванага дачкой пісьменніка Галінай Скрыган з выкарыстаннем матэрыялаў з яго асабістага архіва.
Буклет, прысвечаны жыццю і творчасці Я. Скрыгана, падрыхтаваны Г. І. Скрыган
Галіна Іванаўна Скрыган з самага пачатку актыўна ўключылася ў стварэнне кантэнту пра бацьку і працягвае супрацоўнічаць з Нацыянальнай бібліятэкай Беларусі з мэтай папулярызацыі яго творчасці. Яна шмат робіць для ўшанавання памяці пісьменніка: перадае ў музеі, бібліятэкі, архівы асабістыя рэчы Я. Скрыгана, арыгіналы дакументаў і рукапісаў, фотаздымкі, выдае кнігі, прысвечаныя бацьку.
12 лістапада 2020 г. падчас літаратурнага вечара “Кругі лёсу Яна Скрыгана” ў Нацыянальнай бібліятэцы Беларусі быў прэзентаваны новы раздзел віртуальнага праекта “На хвалі часу, у плыні жыцця” да 115-годдзя з дня нараджэння пісьменніка. На мерапрыемстве Галіна Іванаўна прэзентавала кнігу “Фоталетапіс з хатняга архіва Яна Скрыгана” (2020), якая была пазней алічбавана, а яе копія размешчана ў межах праекта
Галіна Скрыган падчас літаратурнага вечара “Кругі лёсу Яна Скрыгана”. 12.11.2020. Фота Н. Жарскай
5 верасня 2021 г. на XXVIII Дні беларускага пісьменства ў г. Капыль адкрылася Алея пісьменнікаў, ураджэнцаў Капыльшчыны, дзе Галіна Скрыган прэзентавала памятны знак у выглядзе літары “С”, прысвечаны пісьменнікам Яну Скрыгану і Васілю Сташэўскаму. Нацыянальная бібліятэка таксама прэзентавала віртуальныя праекты, прысвечаныя ўраджэнцам капыльскага краю, сярод іх быў праект да 115-годдзя з дня нараджэння Яна Скрыгана.
Галіна Скрыган на Алеі пісьменнікаў у Капылі. 05.09.2021. Фота Э. Дзвінскай
Дзякуючы яе намаганням у ДУА “Каменскі вучэбна-педагагічны комплекс дзіцячы сад – сярэдняя школа” ў а.г. Камень Капыльскага раёна была арганізавана прысвечаная Яну Скрыгану экспазіцыя (цяпер гэта музей “Бацькаўшчына”). Экспазіцыя адкрылася 11 лістапада 2011 г. і працуе ўжо 10 гадоў.
Віншуем установу-партнёра, якая далучылася да працы над праектам, з такой прыгожай датай!
Рабочы стол Яна Скрыгана ў экспазіцыі музея “Бацькаўшчына”
Сачыце за нашымі навінамі!
Матэрыял падрыхтаваны інфармацыйна-аналітычным аддзелам.