Мінулы год выдаўся багатым на юбілеі. І адным з іх стала 135-годдзе Змітрака Бядулі.
Адзначаць яго супрацоўнікі бібліятэкі прапанавалі асабліва, праз цікавыя ініцыятывы, якія дапамогуць ушанаваць пісьменніка, папулярызаваць яго творчасць сярод шырокай аўдыторыі дзяцей і дарослых. Тым больш што «нацыяналка» ўжо мела падобны вопыт. Так, да анлайн-конкурсу чытальнікаў, прысвечанага 120-годдзю з дня нараджэння Уладзіміра Дубоўкі, далучыліся сотні ўдзельнікаў з розных куткоў Беларусі.
Конкурс «Беларускі салавей» ізноў пацвердзіў, што айчынных класікаў з задавальненнем чытаюць і малыя, і дарослыя. Журы (навукоўцы, літаратуразнаўцы, філолагі) ледзьве паспявалі праглядаць творчыя работы, якія дасылалі школьнікі, навучэнцы каледжаў, студэнты, удзельнікі літаратурных аб'яднанняў, настаўнікі, бібліятэкары, пенсіянеры. Эсэ, прысвечаныя творчасці Бядулі, даслалі 827 чалавек. Узрост удзельнікаў – ад 6 да 71 года. Адна работа прыйшла нават з горада Кірсанаў Тамбоўскай вобласці Расійскай Федэрацыі. Арганізатары конкурсу нават вырашылі падзяліць удзельнікаў на ўзроставыя групы і дадаць спецыяльныя намінацыі за новае бачанне творчасці Змітрака Бядулі, за прыгажосць мовы, за любоў да паэзіі (некаторыя работы былі напісаныя вершаванымі радкамі).
Як адзначыў адзін з членаў журы – вядучы навуковы супрацоўнік Інстытута літаратуразнаўства імя Янкі Купалы Цэнтра даследаванняў беларускай культуры, мовы і літаратуры НАН Беларусі Анатоль Трафімчык, такая актыўнасць сведчыць пра тое, што літаратурны працэс у нашай краіне развіваецца, расце цікавасць да роднай мовы. Магчыма, сярод соцень канкурсантаў падрастаюць будучыя пісьменнікі і літаратуразнаўцы.
Удзельнікам удавалася ствараць арыгінальныя работы – эсэ з сюжэтнай лініяй па творах Змітрака Бядулі, дзе адлюстроўвалася жыццё герояў, што папярэднічала б падзеям, апісаным класікам (prequel), ці стала б яго працягам (sequel), альбо падавала паралельнае арыгінальнаму твору развіццё падзей са знаёмымі персанажамі ці эпізодамі (spіn-off).
Юныя ўдзельнікі часта рабілі малюнкі па творах Змітрака Бядулі, запісвалі аўдыя і відэа. Работы актыўна друкаваліся ў сацыяльных сетках, а ў хуткім часе некаторыя з іх будуць надрукаваныя ў беларускіх часопісах і прагучаць на радыё.
Ганаровым госцем на ўрачыстасці, дзе падводзіліся вынікі конкурсу, стаў сын Змітрака Бядулі Яфім Плаўнік, які таксама сачыў за праектам і знаёміўся з работамі. Ён заўважыў, што сучаснікам класіка таксама давялося асэнсоўваць яго цудоўныя творы.
– Дзе вы знойдзеце літаратурны твор, па якім бы быў пастаўлены фільм, створаны балет (пасля вайны планавалася яшчэ стварыць оперу, але нешта не склалася), ішла п'еса, у якой былі задзейнічаны найлепшыя беларускія акцёры, – звярнуў увагу Яфім Самуілавіч на аповесць Бядулі «Салавей». – Не простым творам і сёння лічыцца напісаная перад Вялікай Айчыннай вайной «Сярэбраная табакерка». Ёй было прысвечана багата артыкулаў, як ухвальных, так і разгромных, у свой час былі праблемы з выхадам у свет – сябры адгаворвалі Бядулю, бо пасля друку маглі быць пэўныя наступствы. Класікі гадалі, што гэта за твор: філасофская казка, прытча?..
Конкурс «Беларускі салавей» ладзіўся ў межах вялікага віртуальнага праекта Нацыянальнай бібліятэкі «На хвалі часу, у плыні жыцця», які знаёміць з жыццём і творчасцю пісьменнікаў літаратурнага аб'яднання «Маладняк».
У Нацыянальнай бібліятэцы “Беларускі салавей” загучаў па-новаму
Аўтар публікацыі: Алена Дзядзюля.
Крыніца: Звязда