З 6 лістапада па 10 снежня 2007 года ў зале дакументаў міжнародных арганізацый Нацыянальнай бібліятэкі Беларусі (2 паверх, пакой 207g) адкрыта тэматычная кніжная выстаўка "Ад нецярпімасці да згоды", прымеркаваная да Міжнароднага дня цярпімасці.

Гэты дзень быў урачыста абвешчаны ў Дэкларацыі прынцыпаў цярпімасці, зацверджанай у 1995 годзе на 28-ай Генеральнай канферэнцыі ЮНЕСКА, і адзначаецца штогод у свеце16 лістапада.

Матэрыялы выстаўкі ўсебакова раскрываюць адну з найбольш актуальных праблем развіцця сучаснага грамадства, паколькі ва ўмовах жорсткай эканамічнай канкурэнцыі ў свеце, міграцыі насельніцтва, складаных міжканфесійных адносінах неабходнасць у цярпімасці адчуваецца больш востра, чым калі б гэта ні было. У кантэксце глабальных змен у грамадска-палітычным і духоўным жыцці сусветнай супольнасці пытанні цярпімасці (талерантнасці) набываюць асаблівае значэнне.

Якія шляхі, формы і наступствы буйных сацыяльных змен? Як суадносяцца гэтыя заканамерныя працэсы з мірнымі памкненнямі людзей, з узрослым у XXI стагоддзі ўплывам прынцыпаў і ідэй цярпімасці, ненасілля, згоды і супрацоўніцтва? Гэтыя і шматлікія іншыя пытанні раскрыты ў прапанаванай увазе наведвальнікаў кніжнай экспазіцыі, што ўключае больш за 50 дакументаў міжнародных арганізацый (ААН, ЮНЕСКА, Еўрапейскага Саюза і іншых) на рускай, англійскай і польскай мовах. Сярод прадстаўленых на выстаўцы матэрыялаў – кнігі, перыядычныя выданні, мімеаграфаваныя матэрыялы ААН, брашуры, буклеты. У іх разглядаюцца праблемы і пагрозы, што прыносіць нецярпімасць чалавецтву, і прапаноўваюцца розныя шляхі, метады і праграмы, накіраваныя на барацьбу з экстрэмізмам, ксенафобіяй, гвалтам і нецярпімасцю. Падкрэсліваецца значная роля ўрадаў розных краін свету, няўрадавых арганізацый і міжнародных арганізацый ва ўкараненні ў жыццё сусветнай супольнасці культуры міру, плюралізму, узаемнай павагі і мірнага суіснавання.

Найбольш поўна тэматыка выстаўкі асветлена ў кнігах «Общественные перемены и Культура Мира», «Толерантность (введение в проблему)» С.К. Бондыравай, «Идентичность и толерантность», «От нетерпимости к согласию», «Психология и педагогика толерантности», «Вопросы толерантности: история, современность, перспективы», «Толерантность сознания и формирование толерантного отношения (теория и практика)», «Толерантность и динамика самочувствия в современном российском обществе» П.М. Козыравай, «Диагностика толерантности в средствах массовой информации», «Declaration of Principles on Tolerance», «Learning to Live Together in a Globalizing World» і іншых, а таксама ў такіх перыядычных выданнях, як «Обозреватель», «Бюллетень ООН», «Dialogue among Civilization».

У межах правядзення выстаўкі закрануты і шэраг ключавых пытанняў па фармаванні талерантнай свядомасці і цярпімага стаўлення да акружэння ў дзяцей і падлеткаў, незалежна ад іх індывідуальных асаблівасцей, перакананняў, этнічнай прыналежнасці. У гэтых адносінах цікавымі будуць кнігі «На пути к толерантному сознанию», «Терпимость: преддверие мира (учебно-преподавательское руководство по воспитанию в духе мира, прав человека и демократии)», «Тренинг толерантности» С.Д. Шчаколдзінай. Яны адрасаваныя педагогам, псіхолагам, сацыяльным работнікам, а таксама ўсім спецыялістам, якія займаюцца распрацоўкай праблем талерантнасці.

Выстаўка прызначана для шырокага кола чытачоў, якія цікавяцца культурай свету, культурнай разнастайнасцю, праблемамі сучасных міжканфесійных адносін, пытаннямі нецярпімасці і талерантнасці.

Спасылкі на рускамоўныя сайты:

Арганізацыя Аб’яднаных Нацый

Упраўленне Вярхоўнага камісара па правах чалавека

ЮНЕСКА

Спасылкі на англамоўныя сайты:

Арганізацыя Аб’яднаных Нацый