З 1 па 30 снежня ў зале беларускай літаратуры (пам. 205) праходзіць тэматычная выстаўка “Беларускі фэст ласункаў”.
Насуперак распаўсюджанай думцы, кухня Беларусі – гэта не толькі бульба. Гістарычна склалася так, што наш народ меў шматлікія культурныя, эканамічныя і палітычныя міжэтнічныя сувязі на працягу многіх вякоў. Беларуская кухня ўвабрала ў сябе славянскія, балтыйскія, яўрэйскія, часткова нямецкія кулінарныя традыцыі, а пры сацыялізме – яшчэ і рэцэптуры ўсіх краін СССР. Тым не менш, яна мае і свае нацыянальныя асаблівасці, якія сфарміраваліся напрыканцы XIX стагоддзя. Увогуле, наша кухня з’яўляецца адной з самых разнастайных ў Еўропе.
Першы раздзел выстаўкі – “Кулінарнае падарожжа” – прысвечаны гісторыі харчавання на тэрыторыі Беларусі пачынаючы з самых старажытных часоў і да XX стагоддзя. Прадстаўленыя дакументы раскрываюць усе аспекты нацыянальнай кулінарнай спадчыны: рэцэпты сялянскіх і шляхецкіх страў, спосабы прыгатавання і захавання прадуктаў, правілы паводзін, звязаныя з ужываннем ежы, святочныя і штодзённыя трапезы, час і паслядоўнасць іх выкарыстання, посуд. Сярод выданняў па тэме – “Эвалюцыя традыцый харчавання беларусаў у XIX–XX стст.” Т.А. Навагродскага (2015), “Беларуская нацыянальная кухня” А.П. Вашчанкі (2015), “Наша страва” А. Белага (2010), “Літоўская кухарка” В. Завадскай (2013), “Літоўская гаспадыня” (2012) і інш. У раздзел уваходзяць манаграфіі, энцыклапедычныя і перыядычныя выданні на беларускай, рускай, польскай і англійскай мовах.
Другая частка экспазіцыі – “У пошуках смаку” – уключае дакументы, якія расказваюць пра сучаснае развіццё харчовай прамысловасці Беларусі, у тым ліку пра дзейнасць найбуйнейшых айчынных прадпрыемстваў: “Спартак”, “Камунарка”, “Санта Брэмар”, “Аліварыя” і інш.
Завяршаюць выстаўку выбраныя мастацкія творы на беларускай і рускай мовах, звязаныя з кулінарнай тэматыкай, якія складаюць раздзел “Літаратурнае асарці”.
Усяго экспазіцыя налічвае больш за 200 выданняў.
Кантактны тэлефон: (8 017) 293 27 16.
 |
 |
 |
 |
 |
 |
 |
 |
 |
 |
 |
 |
