Юбілейная выстаўка “Белая ластаўка Беларусі”, прысвечаная 80-годдзю з дня нараджэння беларускай паэтэсы і перакладчыцы, заслужанага дзеяча мастацтваў Беларусі Ніны Мацяш (1943–2008), праходзіць з 20 верасня па 30 кастрычніка ў зале беларускай літаратуры (пам. 205).
Творчасць Ніны Мацяш – неацэнны скарб нацыянальнай культуры, духоўна-маральных каштоўнасцей. Для нашчадкаў Ніна Іосіфаўна – гэта ўвасабленне моцы чалавечага духу. У сваіх творах яна неаднаразова звяртаецца да пакутлівага роздуму чалавека над пытаннямі свайго жыцця, прызначэння, напоўненасці зместу свайго існавання.
Светлы сум па ўласным лёсе, незгасальны аптымізм, поўная адсутнасць нараканняў на жыццё і любоў… Любоў да ўсяго і да ўсіх прысутнічаюць у кожным з яе паэтычных зборнікаў, якія прадстаўлены у раздзеле выстаўкі “У краіне промняў ясных”. Таксама у раздзеле змешчаны кнігі для дзяцей, п’есы, эсэ і вершы, напоўненыя святлом кахання і любові.
Развіццё нацыянальнага літаратурнага працэсу Н. Мацяш не ўяўляла без перакладчыцкай дзейнасці. Дасканала авалодаўшы некалькімі замежнымі мовамі, паэтэса поруч з паэтычным майстэрствам адточвала майстэрства перакладчыка. Творчы падыход да тэкстаў дазваляў перакладчыцы не толькі захаваць змест, дух твора, але і паглыбіць часам аўтарскую думку. Яе мастацкія пераклады з французскай, нямецкай, польскай, украінскай моў кніг Ж. Аліўе, А. Сент-Экзюперы, Л. Кастэнка, В. Барны, В. Шымборскай і іншых прадстаўлены у раздзеле экспазіцыі “Таленавітая, шчодрая, мужная”.
Асобна экспануюцца кнігі, артыкулы і энцыклапедычныя матэрыялы, прысвечаныя жыццю і літаратурнай спадчыне паэтэсы.
Прадстаўленыя ў экспазіцыі кнігі можна заказаць праз электронны каталог Нацыянальнай бібліятэкі Беларусі.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 27 16.
Матэрыял пададзены аддзелам абслугоўвання спецыялізаванымі фондамі.
