З 26 лістапада па 31 снежня 2007 года ў зале беларускай літаратуры (пам. 205) праходзіць тэматычная кніжная выстаўка «БІБЛІЯГРАФІЧНАЕ ПАДАРОЖЖА», на якой прадстаўлены беларускія бібліяграфічныя выданні 2005–2007 гг.
У экспазіцыі змяшчаецца каля 250 бібліяграфічных крыніц інфармацыі аб апублікаваных у Беларусі дакументах па ўсіх галінах ведаў. Адметнае месца ў экспазіцыі займаюць выданні Нацыянальнай кніжнай палаты Беларусі, якія выходзяць у серыі «Нацыянальная бібліяграфія Беларусі». Выданне «Летапіс друку Беларусі» ўключае сем дыферэнцыраваных па відах выданняў летапісаў, што выходзяць з рознай перыядычнасцю. Напрыклад: «Кніжны летапіс», «Летапіс нарматыўна-тэхнічных дакументаў і выданняў вузкага прызначэння» (да 2006 г.), «Летапіс аўтарэфератаў дысертацый», «Летапіс нотных выданняў», «Летапіс выяўленчых выданняў», «Летапіс рэцэнзій», «Летапіс картаграфічных выданняў», а таксама выданні, што выходзяць самастойнымі выпускамі: «Кнігі Беларусі», «Летапіс часопісных артыкулаў», «Летапіс газетных артыкулаў», «Летапіс перыядычных выданняў», «Беларусь у сусветным друку» (з 2005 г.), «Паказальнік бібліяграфічных дапаможнікаў Беларусі» і «Бібліяграфічныя дапаможнікі Беларусі ў 2001–2005 гадах: агляды: дадатак да “Паказальніка бібліяграфічных дапаможнікаў Беларусі, 2005”» (2006)і інш.
Да ўвагі наведвальнікаў выстаўкі прапануецца бягучы бюлетэнь універсальнага зместу «Новыя кнігі: па старонках беларускага друку», які з 1960 г. штомесячна выдаецца Нацыянальнай бібліятэкай Беларусі. Ён змяшчае інфармацыю аб кнігах беларускіх выдавецтваў (у тым ліку недзяржаўных), што паступілі ў бібліятэку, і дапамагае сачыць за найбольш значнымі публікацыямі, змешчанымі ў рэспубліканскім перыядычным друку. Кожны год у гэтым выданні друкуецца ў якасці дадатку «Беларускі каляндар на …», асновай якому служыць фактаграфічная БД «Беларусь у асобах і падзеях», якая генерыруецца Нацыянальнай бібліятэкай Беларусі.
У экспазіцыі – бібліяграфічныя паказальнікі краязнаўчага зместу, а таксама выданні, якія інфармуюць аб новых паступленнях у фонды розных бібліятэк краіны: «Літаратура аб Мінскай вобласці», «Новыя паступленні даведачных, метадычных і бібліяграфічных выданняў» (Мінская абласная бібліятэка), «Віцебская вобласць», «Новая літаратура аб Магілёўскай вобласці» і інш.
Шырока прадстаўлены ў экспазіцыі бібліяграфічныя паказальнікі, падрыхтаваныя і выдадзеныя галіновымі інстытутамі Нацыянальнай акадэміі навук Беларусі, Нацыянальным архівам Беларусі і вышэйшымі навучальнымі ўстановамі Рэспублікі Беларусь.
Аб абароненых дысертацыях у Рэспубліцы Беларусь можна даведацца з наступных выданняў: У.М. Міхнюк «Доктарскія і кандыдацкія дысертацыі па гістарычных навуках у Рэспубліцы Беларусь (1991–2003 гг.)», «Экономическая наука Беларуси: Аннотированный указатель докторских и кандидатских диссертаций по экономическим специальностям (1994–2004)», Г.У. Карзенка, Ю.В. Зяньковіч «Аннотированный указатель диссертаций по историческим наукам, защищённых в Республике Беларусь (1991–2005 гг.)».
У ліку прадстаўленых выданняў – выдадзеныя ў апошнія гады персанальныя бібліяграфічныя паказальнікі, прысвечаныя дзеячам навукі і культуры Беларусі: М.М. Улашчыку, Л.М. Сапегіну, М.М. Севярнёву,
Д.Г. Ліню, В.С. Конішчаву, Г.У. Зіновенка, А. І. Смоліку, Н.П. Мішаевай.
Кантактны тэлефон 293-27-16.