З 25 ліпеня па 3 верасня ў зале дакументаў міжнародных арганізацый (пам. 207g) адкрыта тэматычная выстаўка “Дружба – вялікі дар”, прысвечаная Міжнароднаму дню дружбы.
Гэты Дзень быў заснаваны на 65-й сесіі Генеральнай асамблеі ААН 27 красавіка 2011 года і штогод адзначаецца 30 ліпеня (рэзалюцыя 65/275).
У рэзалюцыі Асамблея прапанавала дзяржаўным структурам, міжнародным і рэгіянальным арганізацыям адзначаць гэты Дзень у адпаведнасці з культурнымі традыцыямі той ці іншай краіны і арганізоўваць мерапрыемствы і ініцыятывы, накіраваныя на заахвочванне дыялогу паміж цывілізацыямі, салідарнасці, узаемаразумення і прымірэння.
Асабліва ў рэзалюцыі падкрэсліваецца важнасць новай даты ў справе ўмацавання дружалюбных адносін паміж рознымі народамі. “Дружба паміж народамі, краінамі, культурамі і асобнымі людзьмі можа натхніць на намаганні па забеспячэнні міру і дае магчымасць навесці масты паміж супольнасцямі, якія ўшаноўваюць культурную разнастайнасць”, – гаворыцца ў дакуменце.
Абвяшчэнне Дня было накіравана на падтрымку мэт і задач Дэкларацыі і Праграмы дзеянняў у галіне культуры міру і Міжнароднага дзесяцігоддзя культуры міру і ненасілля ў інтарэсах дзяцей планеты (2001–2010 гады).
Міжнародны дзень дружбы – адно з нямногіх святаў, якое аб’ядноўвае ўсіх людзей на планеце, так як дружба не ведае расавай, рэлігійнай і сацыяльнай розніцы. Дзень дружбы накіраваны на скарачэнне ксенафобіі ў грамадстве, паляпшэнне ўзаемаразумення паміж прадстаўнікамі самых розных нацыянальнасцей, веравызнанняў і культурных плыняў.
Сёння перад чалавецтвам стаіць вялікая колькасць выклікаў і пагроз – галеча, насілле, парушэнне праў чалавека. Гэта падрывае міжнародны мір і бяспеку, сацыяльныя асновы, стварае перашкоды для развіцця, падзяляе людзей і грамадства. Каб паспяхова ім супрацьстаяць, неабходна выкараніць прычыны іх узнікнення. Гэтага можна дамагчыся шляхам талерантнасці і салідарнасці, якія могуць выяўляцца ў шматлікіх формах, у першую чаргу – у дружбе.
Дружба – бескарыслівыя асабістыя ўзаемаадносіны паміж людзьмі, заснаваныя на любові, даверы, шчырасці, узаемных сімпатыях, агульных інтарэсах і захапленнях. Абавязковыя яе прыкметы – узаемнасць, давер і цярпенне. Цудоўна выказаў думку аб дружбе вялікі мысліцель мінулага Цыцэрон: “У свеце няма нічога лепш і прыемней за дружбу, выключыць з жыцця дружбу – усё роўна, што пазбавіць свет сонечнага святла”. Дружба збліжае, бо толькі разам можна дамагчыся згоды, стварыць нармальныя ўмовы для існавання ўсіх людзей, зрабіць свет лепшым.
Прапанаваная чытачам выстаўка налічвае каля 50 дакументаў на рускай, англійскай і нямецкай мовах: кнігі, перыядычныя выданні, мімеаграфаваныя матэрыялы ААН, брашуры, буклеты.
Экспазіцыя ўключае наступныя тэматычныя раздзелы:
- Дружба народаў: разам да адзінай мэты
- Дружба – адзін з галоўных маральных законаў сучаснасці
- Дыялог паміж цывілізацыямі – талерантнасць у вырашэнні палітычных і сацыяльных канфліктаў
- Культура міру, выхаванне ў духу цярпімасці
- Міжкультурны дыялог
Выстаўка адрасуецца шырокаму колу чытачоў, якія цікавяцца культурай міру, культурнай разнастайнасцю, праблемамі сучасных міжканфесійных адносін, пытаннямі талерантнасці, а таксама спецыялістам у галіне сусветнай палітыкі, дыпламатыі, міжнародных зносін, міжнароднага права і канфлікталогіі.
Карысныя спасылкі
- Міжнародны дзень дружбы
- “Альянс цывілізацый”
- Дыялог паміж цывілізацыямі і культура міру
- ААН і пытанне аб свабодзе рэлігіі ці перакананняў
- Права на свабоду перакананняў і іх свабоднае выяўленне
- Сусветны дзень культурнай разнастайнасці ў імя дыялогу і развіцця
- Міжнародны дзень міру
- Міжнародны дзень, прысвечаны цярпімасці
- 2010 год: Міжнародны год збліжэння культур
- 2000 год: Міжнародны год культуры міру [A/RES/52/15]
- 2001–2010: Міжнароднае дзесяцігоддзе культуры міру і ненасілля ў інтарэсах дзяцей планеты
Дакументы
- Пертская дэкларацыя, прынятая на пятай нарадзе Рэгіянальнага міжканфесійнага дыялогу (30 кастрычніка 2009 года)
- Астанінская дэкларацыя, прынятая ўдзельнікамі канферэнцыі міністраў па тэме “Агульны мір: прагрэс праз разнастайнасць” (Казахстан, 17 кастрычніка 2008 года)
- Мадрыдская дэкларацыя, прынятая Сусветнай канферэнцыяй па дыялогу, якая была арганізавана Сусветнай мусульманскай лігай, у Мадрыдзе пад эгідай Захавальніка дзвюх свяшчэнных мячэцей караля Абдалы ібн Абдуль Азіза аль Сауда
(16–18 ліпеня 2008 года) - Пномпеньскі дыялог 2008 года аб міжканфесійным супрацоўніцтве ў інтарэсах міру і згоды
- Бакінская дэкларацыя аб пашырэнні ролі жанчын у міжкультурным дыялогу
- Дэкларацыя аб садзейнічанні дыялогу і ўзаемаразуменню паміж рэлігіямі і цывілізацыямі (“Охрыд 2007”)
- Глабальны парадак дня для дыялогу паміж цывілізацыямі (2001 год)
- Дэкларацыя і Праграма дзеянняў у галіне культуры міру (1999 год)
- Тэгеранская дэкларацыя аб дыялогу паміж цывілізацыямі, прынятая на Ісламскім сімпозіуме па дыялогу паміж цывілізацыямі (1999 год)
- Афінская дэкларацыя: “Спадчына старажытных цывілізацый: наступствы для сучаснага свету” (1998 год)
- Дэкларацыя аб ліквідацыі ўсіх форм нецярпімасці і дыскрымінацыі на аснове рэлігіі ці перакананняў (1981 год)
Час работы выстаўкі адпавядае рэжыму работы залы дакументаў міжнародных арганізацый.
Уваход – па чытацкім білеце або білеце сацыякультурнага цэнтра бібліятэкі.
