Зала выяўленчых і відэадакументаў запрашае наведаць выстаўку “Этнаграфічная паштоўка з фондаў Нацыянальнай бібліятэкі Беларусі”.
Калекцыя выяўленчых дакументаў, што знаходзяцца ў фондах Нацыянальнай бібліятэкі Беларусі, складае больш за 71 тыс. адзінак захоўвання. Сярод іх – плакаты, рэпрадукцыі, эстампы і паштоўкі. Разнавіднасцю арыгінальных паштовых картак з’яўляецца этнаграфічная паштоўка.
Гэты від паштоўкі – адзін з найбольш даступных сродкаў знаёмства з прыродай, побытам, архітэктурай і культурай народаў свету. Паштоўкі з выявамі гістарычных, геаграфічных, архітэктурных аб’ектаў, помнікаў матэрыяльнай культуры набылі з часам характар дакументальных крыніц. І чым большы тэрмін аддзяляе нас ад часу іх стварэння, тым выразней выступаюць яны ў некалькіх якасцях: гістарычнай крыніцы, крыніцы інфармацыі, твора мастацтва.
На выстаўцы дэманструюцца альбомы, кнігі, артыкулы і паштоўкі, створаныя ў перыяд з канца XIX да сярэдзіны XX ст. Шырока прадстаўлены беларускі і рускі народны касцюм, адзенне іншых славянскіх народаў, а таксама побыт, звычаі і касцюмы іншых краін свету.
Экспазіцыя разлічана на ўсе катэгорыі чытачоў, якія цікавяцца гісторыяй, этнаграфіяй, культурай народаў свету, а таксама малафарматнай друкаванай графікай.
Выстаўка працуе з 22 снежня 2008 года па 12 студзеня 2009 года на 3-м паверсе ў зале выяўленчых і відэадакументаў (пам. 307).
Кантактны тэлефон: 293-27-58.
 |
 |
 |
 |
 |
 |
