З 24 студзеня па 6 лютага ў навуковай чытальнай зале (пам. 206) арганізавана выстава “Гістарычная памяць у публікацыях беларускіх навукоўцаў”.
2022 год аб’яўлены на Беларусі Годам гістарычнай памяці з мэтай захавання праўды аб гісторыі беларускага народа і кансалідацыі грамадства.
Гістарычная памяць – адна з найбольш актуальных і дыскусійных полідысцыплінарных праблем – знайшла сваё адлюстраванне і ў працах беларускіх вучоных. Даследчыкі гісторыі, філасофіі, сацыялогіі і іншых галін ведаў кранаюць у сваіх публікацыях розныя аспекты гістарычнай памяці: тэорыю і метадалогію, змест і функцыі, каналы фарміравання і формы існавання.
Увагу навукоўцаў прыцягвае і палітыка памяці, або гістарычная палітыка, бо менавіта дзяржаве належыць вызначальная роля ў стварэнні нацыянальнай канцэпцыі гісторыі краіны, адборы галоўных падзей, персанажаў, каштоўнасцей мінулага, якія замацоўваюцца ў гістарычнай памяці грамадства праз школьныя падручнікі і падручнікі ВНУ, сродкі масавай інфармацыі, творы культуры і мастацтва, масавыя мерапрыемствы і святы.
Шэраг сацыягуманітарных даследаванняў прысвечаны практыцы фарміравання і захавання гістарычнай памяці. Рэальны стан гістарычнай памяці насельніцтва Беларусі і тэндэнцыі яе развіцця акрэслены вынікамі сацыялагічных маніторынгаў.
Прадстаўленыя публікацыі аб’яднаны думкай, што захаванне гістарычнай памяці садзейнічае самаідэнтыфікацыі беларускага народа, выхаванню патрыятызму і пачуцця гордасці за гераічнае мінулае.
Час работы выставы адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Прадстаўленыя ў экспазіцыі кнігі можна заказаць праз электронны каталог Нацыянальнай бібліятэкі Беларусі.
Тэлефон для даведак: (8 017) 293 27 23.
Матэрыял пададзены аддзелам бібліятэчнага абслугоўвання.
