З 3 лістапада па 10 студзеня ў Нацыянальнай бібліятэцы Беларусі (2-гі паверх, кальцавы калідор) ладзіцца юбілейная кніжная выстаўка “І зорка гарыць, і не вяне вянок...”, прымеркаваная да 120-годдзя з дня нараджэння Максіма Багдановіча.
У скарбніцы класічнай беларускай літаратуры творчасць Максіма Багдановіча займае асаблівае месца. Ён быў не толькі бліскучым паэтам, але і таленавітым літаратуразнаўцам, гісторыкам і лінгвістам.
За сваё нядоўгае жыццё Максім Багдановіч напісаў шмат твораў, узбагаціўшы беларускую паэзію глыбокімі па змесце і цікавымі па форме вершамі. Знакаміты паэт успрыняў традыцыі і вопыт перадавых дзеячаў рускай, беларускай і замежнай паэтычных культур. Рознабаковым творчым вопытам і скарыстаннем шматгранных форм і літаратурных стыляў, рытмаў і памераў ён узняў беларускае вершаскладанне – гібкае, мілагучнае і музыкальнае – на больш высокую ступень.
Паэзія Максіма Багдановіча нязменна прываблівае чытачоў, даследчыкаў і гісторыкаў літаратуры і мастацтва. Творчасць самабытнага паэта мае найвелізарнейшае значэнне як выразны помнік эпохі, у якую жыў і тварыў аўтар і якую ён ярка адлюстраваў пяром чулага мастака слова.
На юбілейнай кніжнай выстаўцы "І зорка гарыць, і не вяне вянок...", прысвечанай 120-годдзю Максіма Багдановіча, прадстаўлена каля 200 дакументаў. Гэта кнігі з яго творамі і літаратура пра жыццё і творчасць вялікага класіка беларускай літаратуры.
Сярод кніг, якія дэманструюцца на выстаўцы, – тры прыжыццёвыя выданні. Гэта кнігі "Беларускае адраджэнне", якія выйшлі ў друк у 1915 і 1916 гг. на Украіне, і кніга "Братья-чехи", надрукаваная ў Яраслаўлі ў 1914 г. Побач з сучаснымі выданнямі на выстаўцы экспануецца факсіміле кнігі выбраных вершаў Максіма Багдановіча "Вянок", поўны збор твораў Максіма Багдановіча ў 3-х тамах і больш за 30 кніг з творамі вялікага паэта. У экспазіцыі таксама прадстаўлены каля 40 кніг з перакладамі паэзіі Максіма Багдановіча на славянскія і еўрапейскія мовы.
Таксама на выстаўцы дэманструецца каля 120 асобных выданняў і артыкулаў у перыядычных выданнях вядомых літаратуразнаўцаў і даследчыкаў творчасці М. Багдановіча, такіх як А. Лойка, Л. Зубараў, С. Майхровіч, А. Бачыла, бібліёграфа і літаратуразнаўцы Н. Ватацы і многіх іншых.
Выстаўка прызначана для ўсіх чытачоў, якія цікавяцца жыццём і творчасцю класіка беларускай літаратуры, паэта, перакладчыка, крытыка, публіцыста і гісторыка роднай літаратуры Максіма Багдановіча.