З 15 красавіка па 2 мая ў аддзеле абслугоўвання афіцыйнымі дакументамі (пам. 207) ладзіцца тэматычная кніжная выстаўка "Інтэлектуальная ўласнасць: ахова і развіццё ў свеце".
Выстаўка прысвечана Міжнароднаму дню інтэлектуальнай уласнасці і 40-годдзю Сусветнай арганізацыі інтэлектуальнай уласнасці.
Міжнародны дзень інтэлектуальнай уласнасці быў заснаваны Генеральнай асамблеяй Сусветнай арганізацыі інтэлектуальнай уласнасці (САІУ) у верасні 2000 г. і штогод адзначаецца 26 красавіка. Менавіта ў гэты дзень у 1970 годзе ўступіла ў сілу Канвенцыя, паводле якой заснавана арганізацыя.
У 2010 г. САІУ святкуе дзве падзеі – 10-ю гадавіну Міжнароднага дня інтэлектуальнай уласнасці і 40-ю гадавіну з дня ўступлення ў сілу Канвенцыі, паводле якой заснавана САІУ.
Сусветная арганізацыя інтэлектуальнай уласнасці – гэта спецыялізаваная ўстанова Арганізацыі Аб’яднаных Нацый. Яе дзейнасць прысвечана развіццю збалансаванай і даступнай міжнароднай сістэмы інтэлектуальнай уласнасці (ІУ), якая забяспечвае ўзнагароду за творчую дзейнасць, стымулюе інавацыі і ўносіць уклад у эканамічнае і культурнае развіццё грамадства. На сённяшні дзень членамі САІУ з’яўляюцца 184 дзяржавы (больш за 90 % краін свету). Канвенцыя вызначае наступныя мэты арганізацыі:
- 1. Садзейнічанне ахове інтэлектуальнай уласнасці ва ўсім свеце праз супрацоўніцтва дзяржаў і ў адпаведных выпадках ва ўзаемадзеянні з любой іншай міжнароднай арганізацыяй.
2. Забеспячэнне адміністрацыйнага супрацоўніцтва саюзаў, створаных для аховы прамысловай уласнасці і для аховы літаратурных і мастацкіх твораў.
Інтэлектуальная ўласнасць падразумявае тварэнні чалавечага розуму: вынаходствы, літаратурныя і мастацкія творы, сімволіку, назвы, выявы і знакі, якія выкарыстоўваюцца ў гандлі. У шырокім разуменні яна азначае замацаваныя законам выключныя правы на вынік інтэлектуальнай дзейнасці або сродкі індывідуалізацыі.
Ролю інтэлектуальнай уласнасці ў нашым жыцці цяжка пераацаніць, паколькі цывілізацыя развівалася дзякуючы творчаму пачатку чалавецтва. У сучасным свеце інтэлектуальная ўласнасць становіцца падмуркам эканомікі, якая заснавана на ведах і рацыянальна спалучае дзяржаўнае рэгуляванне з рынкавымі механізмамі, накіраванымі на стымуляванне навуковай і інавацыйнай дзейнасці, павышэнне ўзроўню адукацыі, навукі і культуры, фарміраванне новага класа "інтэлектуальных уласнікаў".
Для таго каб паказаць, якім чынам сістэма ІУ спрыяе не толькі развіццю мастацтва і забаўляльнай індустрыі, але і стварэнню тавараў і інавацыйных тэхналогій, САІУ і яе дзяржавы-члены штогод праводзяць Міжнародны дзень інтэлектуальнай уласнасці. Гэты Дзень шырока адзначаецца і ў Рэспубліцы Беларусь, дзе функцыянуе эфектыўная сістэма аховы інтэлектуальнай уласнасці, якая ўключае спецыяльнае заканадаўства і неабходную арганізацыйную інфраструктуру.
Мэты Дня наступныя:
- павышэнне ўзроўню інфармаванасці пра тое, як аўтарскае права, патэнты, таварныя знакі і ўзоры ўплываюць на паўсядзённае жыццё;
- тлумачэнне таго, якім чынам ахова праў ІУ спрыяе развіццю творчай і інавацыйнай дзейнасці;
- прызнанне творчасці аўтараў і наватараў, іх укладу ў развіццё сусветнай супольнасці.
Міжнародны дзень інтэлектуальнай уласнасці сёлета прысвечаны інавацыям, яго тэма – "Інавацыі – аб’ядноўваючы свет".
Экспазіцыя выстаўкі "Інтэлектуальная ўласнасць: ахова і развіццё ў свеце" ўключае наступныя тэматычныя раздзелы:
- інтэлектуальная ўласнасць: роля і месца ў развіцці сучаснага грамадства;
- САІУ і міжнародная ахова інтэлектуальнай уласнасці;
- міжнародныя дагаворы і дамоўленасці ў галіне інтэлектуальнай уласнасці;
- прамысловая ўласнасць і патэнтавае права;
- аўтарскае права і сумежныя правы;
- інавацыйныя тэхналогіі і інтэлектуальная ўласнасць;
- ахова інтэлектуальнай уласнасці ў Рэспубліцы Беларусь.
Выстаўка будзе цікавая студэнтам, аспірантам, выкладчыкам юрыдычных і эканамічных факультэтаў, кіраўнікам прадпрыемстваў, супрацоўнікам навукова-даследчых і прыкладных інстытутаў, юрысконсультам і ўсім, хто цікавіцца праблемамі інтэлектуальнай уласнасці.
Карысныя спасылкі
- Сусветная арганізацыя інтэлектуальнай уласнасці (САІУ)
- Міжнародны дзень інтэлектуальнай уласнасці – 2010
- Міжнародны дзень інтэлектуальнай уласнасці – архіў
- Вынаходствы (патэнты)
- Таварныя знакі
- Прамысловыя ўзоры
- Геаграфічныя ўказанні
- Аўтарскае права
- Сумежныя правы
- Калектыўнае кіраванне аўтарскім правам
- Дагаворы па ахове інтэлектуальнай уласнасці
- Дагаворы аб глабальнай сістэме аховы
- Дагаворы аб класіфікацыях
- Канвенцыя, паводле якой заснавана Сусветная арганізацыя інтэлектуальнай уласнасці