З 5 па 30 студзеня ў зале дакументаў па мастацтве (пам. 306) праходзіць кніжна-ілюстрацыйная выстаўка “Лакавы вернісаж”, прысвечаная мастацтву рускай лакавай мініяцюры.
Невялікая чорная скрыначка, на вечку – тройка, якая ляціць па заснежаным полі, румяныя паненкі ў прыгожых уборах сядзяць на санках, зухаваты кучар падганяе разгарачаных коней… Мілыя падрабязнасці простага чалавечага побыту, намаляваныя на паверхні вытанчанай размаляванай штучкі, перададзены з радасным адчуваннем жыцця.
У творчасці мастакоў лакавай мініяцюры захаваны ўсе грані навакольнай рэчаіснасці, багацце народнага фальклору, сувязь са звычаямі, абрадамі, рытмам сялянскага жыцця. Лепшыя творы майстроў прывабліваюць шчырасцю, прыгажосцю і віртуознасцю выканання.
На выстаўцы прадстаўлены чатыры цэнтры рускай лакавай мініяцюры: Фядоскіна, Палех, Мстэра і Халуй. Экспануюцца альбомы, паштоўкі і рэпрадукцыі, прысвечаныя дзівоснаму і маляўнічаму свету самабытнага мастацтва. Раскрыта яго тэматычная разнастайнасць у выглядзе рэлігійных, філасофскіх, казачных, гістарычных, батальных, жанравых сюжэтаў, а таксама пейзажаў, партрэтаў і арнаментальных кампазіцый. Дапаўняюць экспазіцыю кнігі і артыкулы, якія дазваляюць азнаёміцца з гісторыяй старадаўняга промыслу.
Усяго экспануецца каля 60 экспанатаў.
Кантактны тэлефон: (8 017) 293 27 53.