З 12 ліпеня па 15 жніўня ў зале дакументаў міжнародных арганізацый (пам. 207g) ладзіцца выстаўка “Міжнародная фінансавая карпарацыя: гісторыя і сучаснасць”, прысвечаная 55-годдзю стварэння Міжнароднай фінансавай карпарацыі.
Міжнародная фінансавая карпарацыя (МФК) – гэта міжнародны фінансавы інстытут, які ўваходзіць у структуру Сусветнага банка. Членамі МФК з’яўляюцца 182 краіны, якія фарміруюць статутны фонд карпарацыі ў памеры $2,4 млрд, сумесна вызначаюць палітыку МФК і зацвярджаюць рашэнні аб інвестыцыях. МФК каардынуе сваю дзейнасць з іншымі ўстановамі, што ўваходзяць у склад Групы Сусветнага банка, але ў юрыдычных і фінансавых адносінах з’яўляецца незалежнай арганізацыяй. Штаб-кватэра МФК знаходзіцца ў Вашынгтоне (ЗША).
Задачай Міжнароднай фінансавай карпарацыі з’яўляецца садзейнічанне ўстойліваму прытоку інвестыцый у прыватны сектар краін, якія развіваюцца, у мэтах скарачэння маштабаў беднаты і павышэння жыццёвага ўзроўню ў гэтых краінах. МФК ажыццяўляе інвестыцыйную і кансультатыўную дзейнасць у глабальным маштабе. Намаганні МФК накіраваны на ажыццяўленне ў краінах – членах карпарацыі праектаў, выгадных з эканамічнага пункта гледжання, абгрунтаваных – з фінансавага і камерцыйнага, рацыянальных – з сацыяльнага і экалагічнага і нацэленых на забеспячэнне ўстойлівага развіцця. МФК стымулюе ўстойлівае развіццё прыватнага сектара шляхам:
- фінансавання праектаў у прыватным сектары краін, якія развіваюцца;
- аказанні дапамогі прыватным кампаніям краін, якія развіваюцца, у прыцягненні фінансавання на міжнародных фінансавых рынках;
- аказанні кансультацыйнага і тэхнічнага садзейнічання прадпрыемствам і ўрадам.
Міжнародная фінансавая карпарацыя была створана ў пасляваенныя гады, калі эканоміка краін, якія развіваюцца, усё яшчэ знаходзілася на самых ранніх этапах свайго развіцця, не хапала людскіх рэсурсаў, не было аб’ектаў інфраструктуры і надзейных устаноў, здольных павысіць даходы і жыццёвы ўзровень насельніцтва. Інвестыцыі ў прыватны сектар знаходзіліся на нізкім узроўні, і пытанне пра іх павелічэнне не ўзнікала. Прадпрымальнікі ў гэтых рэгіёнах амаль не валодалі айчыннымі крыніцамі капіталу, не кажучы ўжо пра замежныя. Ім патрэбна была падтрымка.
У 1951 годзе прэзідэнт Сусветнага банка Юджын Р. Блэк і віцэ-прэзідэнт Роберт Л. Гарнер прапанавалі стварыць новую ўстанову ў сістэме Сусветнага банка спецыяльна для ажыццяўлення інвестыцый у прадпрыемствы прыватнага сектара. Прадугледжвалася, што карпарацыя будзе выдзяляць пазыкі, удзельнічаць у акцыянерным капітале прадпрыемстваў і накіроўваць спецыялістаў і экспертаў для ацэньвання інвестыцыйных прапаноў па праектах у прыватным сектары краін, якія развіваюцца, выконваючы тую ж работу, якую праводзіў Сусветны банк у адносінах да праектаў у дзяржаўным сектары. Гэтая ідэя была падтрымана, і ў 1955 годзе спецыялісты Сусветнага банка склалі праект Устаноўчага дагавора, які регуляваў дзейнасць Міжнароднай фінансавай карпарацыі. Афіцыйна МФК была створана ўлетку 1956 года, і яе першым кіраўніком стаў Роберт Гарнер. Сёння МФК з’яўляецца буйнейшай шматбаковай установай, якая дае пазыкі і долевае фінансаванне для праектаў прыватнага сектара краін, што развіваюцца.
Рэспубліка Беларусь першай з краін СНД падпісала адпаведныя дагаворы і стала членам Сусветнага банка і яго падапечных структур, у тым ліку і Міжнароднай фінансавай карпарацыі (МФК). На сённяшні дзень агульны аб’ём інвестыцый МФК у Рэспубліцы Беларусь з пачатку рэалізацыі тут першага інвестыцыйнага праекта карпарацыі (у 2004 годзе) складае парадку 250 млн долараў ЗША.
На тэматычнай кніжнай выстаўцы прадстаўлена больш за 50 дакументаў на рускай і англійскай мовах: кнігі, брашуры, перыядычныя выданні, буклеты.
- Экспазіцыя ўключае наступныя тэматычныя раздзелы:
- Міжнародная фінансавая карпарацыя: гісторыя і сучаснасць;
- Асноўныя напрамкі дзейнасці МФК;
- Інвестыцыйныя праекты і праграмы МФК у Рэспубліцы Беларусь.
Выстаўка будзе карысная спецыялістам у галіне фінансаў, прадпрымальнікам, даследчыкам у галіне малога і сярэдняга бізнесу, студэнтам і выкладчыкам эканамічных і фінансавых спецыяльнасцей.
Карысныя спасылкі:
- Міжнародная фінансавая карпарацыя
- Міжнародная фінансавая карпарацыя: кароткія звесткі
- Артыкулы Пагаднення аб стварэнні Міжнароднай фінансавай карпарацыі
- Міжнародная фінансавая карпарацыя ў Рэспубліцы Беларусь
- Група Сусветнага банка
- Сусветны банк: гісторыя і сучаснасць (спіс літаратуры)
- Беларусь і Сусветны банк (спіс літаратуры)
