З 17 лютага па 30 сакавіка ў зале беларускай літаратуры праходзіць тэматычная выстаўка “Мовы рысы непаўторныя: з калекцыі слоўнікаў беларускай мовы”.
Кожны год 21 лютага ва ўсім свеце пад эгідай ЮНЕСКА шырока адзначаецца Міжнародны дзень роднай мовы. Асноўная мэта гэтага Дня – падтрыманне нацыянальных моў і культур, захаванне нацыянальнай адметнасці і нацыянальнай самабытнасці народа, забеспячэнне права кожнага грамадзяніна карыстацца ў сваёй краіне роднай мовай і стварэнне ўмоў для гэтага з боку дзяржаўных органаў улады.
Мэта разгорнутай экспазіцыі – пазнаёміць наведвальнікаў з калекцыяй шматлікіх і разнастайных слоўнікаў беларускай мовы. Матэрыялы слоўнікаў захавалі ў гісторыі інтэлектуальнае і духоўнае багацце беларускага народа, яго арыгінальны светапогляд і светаўспрыманне, непаўторнае бачанне навакольнай рэчаіснасці. Слоўнікі раскрываюць значэнні слоў, іх паходжанне, утварэнне, вымаўленне, напісанне, даюць пераклад на іншую мову, сістэматызуюць, абагульняюць лексіку мінулых эпох, змяшчаюць звесткі па з’явах і падзеях.
У чатырох раздзелах выстаўкі “Першыя друкаваныя слоўнікі”, “Беларускія слоўнікі XIX – пачатку XX ст.”, “Беларускія слоўнікі 20-х гадоў XX ст.”, “Сучасныя беларускія слоўнікі” прадстаўлены аднамоўныя, двухмоўныя, трохмоўныя, тлумачальныя, перакладныя, гістарычныя і сучасныя, навуковыя, галіновыя, энцыклапедычныя і іншыя слоўнікі. Сярод іх як грунтоўныя лексікаграфічныя працы, так і невялікія цікавыя выданні.
Дапаўняюць экспазіцыю шматлікія публікацыі, якія раскажуць пра гісторыю стварэння некаторых слоўнікаў, іх аўтараў. У ліку экспануемых выданняў – “Старабеларускія лексіконы” (1992), дзе сабраны слоўнікі XVI–XVII стст.; “Слоўнік беларускай мовы” І.І. Насовіча (факс. выд., 1983) – першы навуковы даведнік па лексіцы беларускай мовы сярэдзіны XIX ст., падрыхтоўцы якога вучоны аддаў 16 гадоў напружанай працы; “Беларуска-польска-руска-лацінскі батанічны слоўнік” З. Верас (1924), да якога і сёння звяртаюцца дасведчаныя лексікографы, і інш.
Усяго выстаўка налічвае больш за 100 дакументаў.
Экспазіцыя будзе цікавая філолагам, гісторыкам, краязнаўцам, настаўнікам, усім, хто любіць і шануе родную мову.
Кантактны тэлефон: (8 017) 293 27 16.