З 1 кастрычніка ў музеі кнігі (пам. 348) працуе выстаўка “На скрыжаванні шляхоў…: беларускія землі на старажытных картах і ў рэчавых помніках ХV–XVIII стст.”.
У зборах Нацыянальнай бібліятэкі Беларусі захоўваюцца ўнікальныя картаграфічныя матэрыялы, помнікі сусветнай гісторыі і культуры: атласы свету, карты і апісанні асобных краін і рэгіёнаў.
На выстаўцы дэманструюцца старадрукі, еўрапейскія карты і атласы ХV–XVIII стст., а таксама асобныя выданні рускай картаграфіі XVIII ст. з фонду Нацыянальнай бібліятэкі Беларусі.
Сярод экспанатаў – датаваныя картаграфічныя выявы са знакамітай «Кнігі хронік» Г. Шэдэля (1493), рарытэтныя тэкставыя карты з вядомых гістарычных і геаграфічных прац XVI ст., арыгіналы першай асобнай геаграфічнай карты Вялікага Княства Літоўскага Г. Меркатара (1595) і першай буйнамаштабнай дакладнай «Радзівілаўскай карты» (перавыданне 1640), атлас Еўропы французскага каралеўскага картографа М. Сансона д’Абэвіля (1640–1660), падрабязная карта Польшчы італьянскага картографа і географа Дж.А. Рыцы-Заноні (1772), карты канца XVIII – пачатку ХІХ ст. з выдатных расійскіх атласаў частак зямнога шара.
Побач з творамі картаграфіі ў экспазіцыі прадстаўлены асобныя старонкі старадрукаў і рэчавыя помнікі беларускага насельніцтва XV–XVIIIcтст. з фондаў Інстытута гісторыі НАН Беларусі і прыватнай калекцыі І.В. Сурмачэўскага.
Выстаўка будзе працаваць па 30 лістапада 2015 г.
Тэлефоны для даведак: (8 017) 293 27 56, 293 27 22.
Е-mail: pr@nlb.by
|
|
 |
|
 |
 |
 |
