З 14 лістапада па 8 снежня ў зале дакументаў міжнародных арганізацый (пам. 207g) адкрыта выстаўка “Насілле над жанчынамі: праблемы і шляхі пераадолення”, прысвечаная Міжнароднаму дню барацьбы за ліквідацыю насілля адносна жанчын.
Гэты Дзень быў абвешчаны Генеральнай Асамблеяй ААН 17 снежня 1999 года (рэзалюцыя 54/134) і штогод адзначаецца 25 лістапада.
Насілле ў адносінах да жанчын працягвае заставацца глабальнай пандэміяй. Гэтая праблема ўласціва для ўсіх культур і закранае жанчын незалежна ад геаграфічных меж, узроставых катэгорый і расавай прыналежнасці. Жанчыны сутыкаюцца з насіллем у прававой сферы і ў паўсядзённым жыцці. Роўныя правы жанчын, абвешчаныя дэ-юрэ, не з’яўляюцца такімі дэ-факта і часта парушаюцца ў большасці краін. Да 70 % жанчын пакутуюць ад насілля на бытавым узроўні. 35 % жанчын і дзяўчынак падвяргаюцца тым або іншым формам фізічнага або сексуальнага насілля на працягу жыцця. Колькасць непаўналетніх дзяўчынак, прымусова выдадзеных замуж, складае больш за 700 мільёнаў. Штогод ва ўсім свеце прадаюцца сотні тысяч жанчын. Дагэтуль у шэрагу краін забіваюць зародкаў і немаўлят жаночага полу. Занадта часта такія злачынствы і здзекі застаюцца без пакарання, а іх выканаўцы працягваюць знаходзіцца на волі.
Насілле караніцца ў няроўнасці ў адносінах паміж мужчынамі і жанчынамі, якая склалася гістарычна, а таксама ў бесперапыннай дыскрымінацыі жанчын. Яно з’яўляецца не толькі абуральным парушэннем праў чалавека, але і суправаджаецца велізарнымі сацыяльнымі і эканамічнымі выдаткамі. Насілле мае найцяжэйшыя наступствы для жыцця жанчын, іх сем’яў і грамадства ў цэлым і з’яўляецца сур’ёзнай пагрозай для дасягнення міжнародна ўзгодненых мэт у галіне развіцця.
Усведамляючы ўсю важнасць і глабальнасць гэтай праблемы, 20 снежня 1993 года Генеральная Асамблея прыняла Дэкларацыю па выкараненні насілля адносна жанчын (A/RES/48/104), а ў лютым 2008 года генеральны сакратар ААН Пан Гі Мун абвясціў аб пачатку правядзення кампаніі “Разам пакончыць з насіллем у адносінах да жанчын (2008–2015)”, накіраванай на распрацоўку і прыняцце пэўных мер па прадухіленні і выкараненні насілля да жанчын і дзяўчынак ва ўсім свеце.
У Рэспубліцы Беларусь надаецца вялікая ўвага рашэнню праблем насілля адносна жанчын. Стратэгія дзейнасці нашай дзяржавы накіравана на прадухіленне, спыненне і выкараненне гэтага зла. Гэтай стратэгіі наша краіна прытрымліваецца і на міжнароднай арэне. Беларусь выступіла арганізатарам шэрагу міжнародных мерапрыемстваў, нацэленых на фарміраванне эфектыўнага глабальнага партнёрства супраць рабства і гандлю людзьмі ў XXI стагоддзі і насілля ў адносінах да жанчын.
Дакументы, прадстаўленыя на выстаўцы, раскрываюць шматгранную дзейнасць ААН, іншых міжнародных арганізацый, жаночых рухаў і аб’яднанняў, накіраваную на барацьбу з насіллем, знаёмяць з рознымі аспектамі вывучэння гендарных праблем, раскрываюць ролю жанчыны ў сучасным грамадстве.
У экспазіцыі прадстаўлена больш за 80 дакументаў на рускай, англійскай, французскай і нямецкай мовах: кнігі, перыядычныя выданні, мімеаграфаваныя матэрыялы ААН (мастхед), брашуры, буклеты.
Выстаўка складаецца з наступных раздзелаў:
- Міжнародныя і рэгіянальныя прававыя дакументы, накіраваныя на ліквідацыю насілля ў адносінах да жанчын.
- Праблема насілля ў адносінах да жанчын у Рэспубліцы Беларусь.
- Дамашняе насілле. Меры па папярэджанні і спыненні насілля ў адносінах да жанчын у сям’і.
- Жанчына і ўзброеныя канфлікты.
- Жанчына як тавар – праблема гандлю людзьмі.
- Сацыяльная няроўнасць і гендарная дыскрымінацыя.
Выстаўка будзе цікавая студэнтам, выкладчыкам, сацыяльным педагогам, псіхолагам, юрыстам, спецыялістам у сферы процідзеяння гандлю людзьмі, актывістам праваабарончых і няўрадавых арганізацый.
Карысныя спасылкі
- Міжнародны дзень барацьбы за ліквідацыю насілля ў адносінах да жанчын
- Рамачная праграма дзеянняў Кампаніі генеральнага сакратара ААН "Разам пакончым з насіллем у адносінах да жанчын"
- Дзейнасць ААН па паляпшэнні становішча жанчын
- Кампанія генеральнага сакратара ААН "Разам пакончым з насіллем у адносінах да жанчын"
- Глабальная стратэгія аховы здароўя жанчын і дзяцей
- Матэрыялы Сусветнага банка для навучэнцаў "А ці ведаеш ты... ?"
- Жанчыны, мір і бяспека
- Дапаможнік для парламентарыяў: Канвенцыя аб ліквідацыі ўсіх форм дыскрымінацыі ў адносінах да жанчын і Факультатыўны пратакол да яе
- Сессія Камісіі па становішчы жанчын [Пекін+10] (Нью-Ёрк, 28 лютага – 11 сакавіка 2005 года)
- Спецыяльная сесія Генеральнай Асамблеі [Пекін+5] (Нью-Ёрк, 5–9 чэрвеня 2000 года)
- Чацвёртая сусветная канферэнцыя па становішчы жанчын (Пекін, 4–15 верасня 1995 года)
- Міжнародны дзень нецярпімага стаўлення да калечашчых аперацый на жаночых палавых органах (6 лютага)
- Міжнародны жаночы дзень (8 сакавіка)
- Міжнародны дзень дзяўчынак (11 кастрычніка)
- Міжнародны дзень сельскіх жанчын (15 кастрычніка)
- "Жанчыны свету 2015 года: тэндэнцыі і статыстыка"
- Структура "ААН – Жанчыны": Прадухіліць насілле ў адносінах да жанчын
Дакументы
- Рэзалюцыі Генеральнай Асамблеі
- Рэзалюцыі Савета Бяспекі
- Рэзалюцыі ЭКАСАС
- Даклады генеральнага сакратара
Дэкларацыі, канвенцыі і пагадненні
- Тыпавыя стратэгіі і практычныя меры па выкараненні насілля ў адносінах да жанчын у галіне прадухілення злачыннасці і крымінальнага правасуддзя (1997 год)
- Дэкларацыя аб выкараненні насілля ў адносінах да жанчын (1993 год)
- Канвенцыя аб ліквідацыі ўсіх форм дыскрымінацыі ў адносінах да жанчын (1979 год) (гл. таксама Факультатыўны пратакол)
- Дэкларацыі па правах жанчын
- Канвенцыі па правах жанчын
 |
 |
 |
 |
 |
 |
 |
