З 15 снежня па 4 студзеня ў зале дакументаў па мастацтве (пам. 306) праходзіць тэматычная выстаўка “Нябачныя для ўсіх анёлы…”.
Слова “анёл” у перакладзе з грэчаскай азначае “веснік” або “пасланец”. Гэтыя бесцялесныя істоты, якіх адлюстроўваюць з крыламі, служаць пасланцамі Бога, пасрэднікамі паміж Ім і людзьмі. Легкакрылыя веснікі незямной прасторы, жыхары неба, добрыя ахоўнікі, якія як маланка, як думка, ляцяць на дапамогу людзям… Складана ўявіць рэлігію без веры ў анёлаў.
Са старажытных часоў людзі ўкладвалі свае лепшыя мары пра дасканаласць у вобраз акрыленай чалавекападобнай істоты.
Выявы святых нябесных пасланцоў сталі неад’емнай часткай шматлікіх выдатных твораў іканапісу, увасобіліся ў жывапісе, графіцы і скульптуры.
Анёлы – тыповыя персанажы навагодніх і калядных паштовак, на якіх яны адлюстроўваюцца пераважна дзецьмі як самыя чыстыя і бязгрэшныя.
На выстаўцы экспануюцца кнігі, альбомы, ілюстрацыі ікон і рэпрадукцыі маляўнічых палотнаў, якія раскрываюць вобраз анёлаў у літаратуры і мастацтве. Сярод дакументаў звяртаюць на сябе ўвагу кніга І. Бенчава “Иконы ангелов” (2005), прысвечаная аднаму з раздзелаў іканаграфіі – адлюстраванню свету анёлаў, выданне Р.Э. Гуілі “Энциклопедия ангелов” (2008) і інш.
Экспазіцыю дапаўняе калекцыя паштовак.
Усяго на выстаўцы прадстаўлена звыш 50 дакументаў.
Кантактны тэлефон: (8 017) 293 27 53.