З 1 па 31 снежня 2008 года ў зале беларускай літаратуры (пам. 205) праходзіць выстаўка “Паэзія жыцця і любові”, прысвечаная 90-годдзю з дня нараджэння беларускага пісьменніка і перакладчыка Кастуся (Канстанціна Ціханавіча) Кірэенкі (1918–1988).
Творчы пошук Кастуся Кірэенкі быў грунтоўны і плённы. У беларускай паэзіі ён сцвердзіў сябе як паэт мужнага і глыбокага лірычнага таленту.
Аснову першага раздзела экспазіцыі “Прага чалавечнасці” складаюць зборы твораў аўтара, асобныя выданні такіх паэтычных зборнікаў, як “Ранак ідзе” (1945), “Пасля навальніцы” (1947), “Мая рэспубліка” (1949), “Светлая хваля” (1959), “Слаўся, юнацтва” (1961), “Смага” (1962), “Жывыя ідуць наперад” (1964), “Цёплая радуга” (1966), “Ручаіны шукаюць ракі” (1967), “Кніга ста песень” (1971), “Сіні вырай” (1976), “Заўсёды з Радзімай” (1980), “Дэкрэтам сэрца” (1983), “Калыска вятроў” (1985), “Вандроўнае шчасце. Рыбацкая паэма” (1988), “Ты ўсё знаеш, мая песня” (1995), а таксама публікацыі твораў паэта ў зборніках і перыядычных выданнях.
Значнае месца ў раздзеле займаюць пераклады твораў Кастуся Кірэенкі на рускую, украінскую, малдаўскую, французскую і іншыя мовы.
У наступным раздзеле “Творчым шляхам” прадстаўлена перакладчыцкая дзейнасць Кастуся Кірэенкі. Пісьменнік перакладаў на беларускую мову творы такіх паэтаў, як У. Маякоўскі, Л. Смалянскі, М. Нарышкін, В. Біянкі, А. Міцкевіч, М. Нагнібеда, В. Карамазаў і інш.
З жыццём і творчасцю юбіляра знаёмяць публікацыі, змешчаныя ў раздзеле “Спадарожнік часу”.
На выстаўцы экспануецца больш за 90 дакументаў.
Кантактны тэлефон: 293-27-16.