З 7 снежня па 10 студзеня ў галерэі “Атрыум” (3-ці паверх) праходзіць юбілейная выстаўка “Першы рамантык”, прысвечаная 220-годдзю з дня нараджэння Адама Міцкевіча.
Адам Бернард Міцкевіч – беларускі польскамоўны паэт, грамадскі дзеяч, асветнік, публіцыст. Яго лёс склаўся так, што жыццё нашага знакамітага ўраджэнца можна з упэўненасцю назваць сімвалам лёсу цэлага пакалення.
Нарадзіўся будучы паэт у 1798 г. у Завоссі на Наваградчыне ў шляхецкай сям’і. Дзяцінства правёў у Навагрудку. Падчас вучобы на гісторыка-філалагічным факультэце Віленскага ўніверсітэта разам з сябрамі заснаваў тайнае студэнцкае таварыства, за што быў арыштаваны ў 1824 г. і высланы за межы Беларусі, куды ўжо ніколі не вярнуўся. У 1829 г. атрымаў дазвол выехаць у Заходнюю Еўропу, жыў у Італіі, Швейцырыі, Францыі. З 1839 г. выкладаў славянскую літаратуру ў Парыжы. У канцы напоўненага грамадскай актыўнасцю жыцця Адам Міцкевіч аказаўся ў Турцыі, дзе памер 26 лістапада 1855 г.
Станаўленне паэта прыйшлося на час зараджэння рамантызму ў сусветнай літаратуры Яго “Песня філарэтаў” (“Спявайма толькі тое, што родны склаў народ”, 1820 г.) заклала пачатак рамантычнай плыні ў беларускай літаратуры. Адам Міцкевіч надзвычай высока ўзняў перад светам веліч і прыгажосць творчасці беларускага краю, раскрыў багацце нашых традыцый і абрадаў, сюжэтаў балад і паданняў, вобразаў і матываў.
Творчасць Адама Міцкевіча стала праявай нацыянальна-вызваленчага руху на тэрыторыі былой Рэчы Паспалітай. Усё сваё жыццё паэт даводзіў, што не можа быць шчасця для чалавека ў зняволенай, нешчаслівай краіне, а сваёй паэзіяй дарыў патрыётам-паплечнікам надзею ў самых безнадзейных момантах, калі ўжо не маглі дапамагчы ніякія рацыянальныя довады.
Прадстаўленая чытачу выстаўка дазваляе азнаёміцца з самымі значнымі выданнямі па даследаванні жыцця і творчасці паэта, зборнікамі выбраных твораў. Асобнае месца на выстаўцы займаюць выданні розных гадоў яго бессмяротных паэм “Пан Тадэвуш”, “Гражына”, “Конрад Валенрод”, “Дзяды”. Некаторыя кнігі распавядаюць пра сучаснікаў і сяброў паэта.
На выстаўцы прадстаўлены каля 100 дакументаў, сярод якіх – выданні ХІХ–ХХ стст., партрэты Адама Міцкевіча і ілюстрацыі да яго твораў.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Прадстаўленыя ў экспазіцыі кнігі можна заказаць праз электронны каталог Нацыянальнай бібліятэкі Беларусі.
Тэлефон для даведак: (8017) 293 29 80.
