З 2 лістапада па 31 снежня ў зале перыядычных выданняў (пам. 106) праходзіць тэматычная выстаўка "Перыядычныя выданні – юбіляры 2011 года".
У экспазіцыі прадстаўлены юбілейныя выпускі газет і часопісаў, а таксама матэрыялы пра іх.
Сёлета 90-годдзе адсвяткавалі два найстарэйшыя выданні краіны – газета Міністэрства абароны Рэспублікі Беларусь "Белорусская военная газета. Во славу Родины", заснаваная 22 чэрвеня 1921 года, і грамадска-палітычная газета "Белорусская нива", якая выдаецца са студзеня 1921 года. З публікацый, прадстаўленых у экспазіцыі, можна пазнаць пра багатую гісторыю, слаўныя традыцыі і этапы вялікага шляху, які прайшлі гэтыя выданні.
У ліку юбіляраў – сатырычна-гумарыстычны ілюстраваны альманах "Вожык", які адзначыў у ліпені сямідзесяцігадовы юбілей. Наведвальнікам выстаўкі будзе цікава пазнаць, што першы нумар гэтага выдання ўбачыў свет ў Гомелі 5 ліпеня 1941 года ў выглядзе агітплаката з назвай "Раздавім фашысцкую гадзіну", затым з 1942 года – як газета-плакат з той жа назвай, а са жніўня 1945 года – як часопіс сатыры і гумару "Вожык".
Працягваюць экспазіцыю матэрыялы, прысвечаныя дваццацігоддзю газет "Рэспубліка", "Народнае слова", "Прессбол", якія заваявалі заслужаную папулярнасць і любоў у чытачоў.
Усяго жа на выстаўцы прадстаўлена каля дваццаці перыядычных выданняў-юбіляраў.
Кантактны тэлефон: 293-27-85.
 |
 |
 |
 |
