З 20 снежня па 20 лютага ў Нацыянальная бібліятэцы Беларусі з нагоды 90-гадовага юбілею часопіса “Полымя” ладзіцца кніжна-ілюстрацыйная выстаўка “«Полымя» – этапы творчага станаўлення”.
Юбілей літаратурна-мастацкага і грамадска-палітычнага часопіса “Полымя” – значная падзея ў гісторыі беларускага грамадства.
Выстаўка адлюстроўвае змест і настрой часопіса з самага першага нумара 1922 года да апошняга на 2012 год. Экспазіцыя складзена ў зваротнахраналагічным парадку па дзесяцігоддзях. Побач з першымі нумарамі часопіса знаходзяцца выданні некаторых аўтараў, якія публікаваліся на працягу пэўнага года. Так, 20-я гады, адметныя абуджэннем у грамадстве цікавасці да сваіх нацыянальных каранёў, да сваёй літаратуры, прадстаўлены творамі Янкі Купалы, Якуба Коласа (Тараса Гушчы), Міхася Чарота, Цішкі Гартнага, Змітрака Бядулі і інш.
У трагічны і ахвярны для інтэлігенцыі Беларусі перыяд 30-х гадоў часопіс меў назву “Полымя рэвалюцыі”. У тыя часы друкаваліся пераклады твораў Максіма Горкага, Шата Руставелі, Генрыха Гейнэ і інш. Сярод беларускіх пісьменнікаў на гэтым гістарычным этапе значнае месца належала Кузьме Чорнаму. Таксама ў часопісе размешчаны творы Міхася Зарэцкага, Кандрата Крапівы, Міхася Лынькова.
У 40–50-я гады часопіс адраджаўся, як адраджалася і жыццё. Былі апублікаваны такія раманы, як “Людзі на балоце“, “Птушкі і гнёзды”, “Сэрца на далоні” і інш. Гэтыя творы адлюстроўвалі лепшыя бакі жыцця, паказвалі чалавека з уласцівымі яму дабрынёй і высокімі маральнымі якасцямі.
Далей літаратура станавілася больш анталагічнай, быційнай, філасофскай. На старонках часопіса з’яўляюцца творы Васіля Быкава, Алеся Адамовіча, Уладзіміра Караткевіча, Андрэя Макаёнка.
У пачатку ХХІ ст. для вялікай колькасці маладых пісьменнікаў “Полымя” па-ранейшаму застаецца “стартавай пляцоўкай”.
На сённяшні дзень творчы калектыў імкнецца годна захаваць здабыткі часопіса, традыцыі беларускай літаратуры, не забываючы тых пісьменнікаў, якія сталі сапраўднай легендай яшчэ ў ХХ ст., паказвае першаснасць творчай асобы, якая працуе на карысць грамадства.
Кантактны тэлефон: (8 017) 293 29 80.
 |
 |
 |
 |
 |
 |
 |
 |
 |
 |
 |
 |
